10 ఓవర్ల క్రికెట్.. సెహ్వాగ్, గేల్, అఫ్రిది ఓకే

ఒకప్పుడు 50 ఓవర్ల వన్డే మ్యాచ్ వస్తుందంటే క్రికెట్ అభిమానులు టీవీలకు అతుక్కుపోయేవారు. రోజంతా మ్యాచ్ చూస్తూ ఎంజాయ్ చేసేవారు. ఆ తరవాత అది 20 ఓవర్లకు వచ్చింది. టి20లు వచ్చిన తరవాత 50 ఓవర్లకు కాస్త ఆదరణ తగ్గిందనే చెప్పాలి. ధనాధన్ గేమ్‌తో ఈ పొట్టి ఫార్మాట్ అంతలా ఆకట్టుకుంటోంది. కానీ ఇప్పుడు దానికన్నా పొట్టి ఫార్మాట్ వచ్చేస్తోంది. అదే 10 ఓవర్ల క్రికెట్. యునైటెడ్ అరబ్ ఎమిరేట్స్ (యూఏఈ) వేదికగా ఈ టి-10 లీగ్‌ను నిర్వహించనున్నారు. ఈ లీగ్‌లో పాల్గొనడానికి వీరేంద్ర సెహ్వాగ్, క్రిస్ గేల్, షాహిద్ అఫ్రిది, కుమార సంగక్కర‌తో పాటు మరికొంత మంది అంతర్జాతీయ క్రీడాకారులు అంగీకరించారు.

పంజాబీస్, పక్తూన్స్, మరాఠా, బంగ్లాస్, లంకన్స్, సింధీస్, కేరళైట్స్ తదితర జట్లు ఈ లీగ్‌లో పాల్గొననున్నాయి. అఫ్రిది పక్తూన్స్ జట్టుకు సారథ్యం వహిస్తున్నట్లు తెలుస్తోంది. ఎమిరేట్స్ క్రికెట్ బోర్డుతో కలిసి టి టెన్ స్పోర్ట్స్ ఈ లీగ్‌ను నిర్వహిస్తోంది. ఈ ఏడాది డిసెంబర్ 21న షార్జా క్రికెట్ స్టేడియంలో మొదలయ్యే ఈ టోర్నీ 24న ముగియనుంది. కేవలం నాలుగు రోజుల పాటే జరగనున్న ఈ లీగ్ క్రికెట్ అభిమానులను ఏ మేరకు ఆకట్టుకుంటుందో చూడాలి. యూఏఈలో త్వరలో ఆటగాళ్ల వేలం జరగనుంది. ఈ వేలంలో 20కి పైగా అంతర్జాతీయ స్టార్లు పాల్గొననున్నట్లు సమాచారం.