140 అక్షరాల పిచ్‌పై రూ. 30 లక్షలు పోగేసిన వీరూ

క్రికెటర్‌గా రిటైరయ్యాక కామెంట్రీతో అదరగొడుతున్న భారత మాజీ బ్యాట్స్‌మెన్ వీరేంద్ర సెహ్వాగ్.. ట్వీట్లతోనూ అలరిస్తోన్న సంగతి తెలిసిందే. ట్వీటర్లో చాలా యాక్టివ్‌‌గా ఉండే సెహ్వాగ్.. తనదైన పంచ్‌లతో జోకులు పేలుస్తుండటంతో సోషల్ మీడియాలో అతడి ఫాలోవర్ల సంఖ్య విపరీతంగా పెరిగిపోయింది. వీరూ రోజూ ఏ ట్వీట్ చేస్తాడా అని చాలా మంది నెటిజన్లు ఎదురు చూస్తారంటే అతిశయోక్తి కాదు. వీరూ ట్వీట్లు సరదాగా ఉండటంతోపాటు అదిరిపోయే పంచ్‌లతో ఉంటుండటంతో వాటిని వేలాది మంది రీట్వీట్ చేస్తున్నారు. దీంతో గత ఆరు నెలల్లో వీరూ ట్వీటర్ ద్వారానే రూ.30 లక్షలు సంపాదించాడట. ఈ విషయాన్ని సెహ్వాగే స్వయంగా వెల్లడించాడు.

తోటి క్రికెటర్లు, ఇతర ప్రముఖుల పుట్టిన రోజుల సందర్భంగా వీరూ విష్ చేసే స్టయిల్ అందరికీ ఎంతగానో నచ్చుతుంది. ఇక వీరూ జోకులకైతే నెటిజన్లు పగలబడి నవ్వుతున్నారు. వారు వాటిని విపరీతంగా రీట్వీట్ చేస్తుండటంతో స్పాన్సర్ల నుంచి తనకు డబ్బులు వస్తున్నాయని వీరూ తెలిపాడు. ట్వీటర్లో జోకులు పేల్చడమే కాదు.. ఎవరైనా తేడాగా మాట్లాడితే తాట తీసేందుకు కూడా సెహ్వాగ్ వెనకడుగు వేయడనే సంగతి నెటిజన్లకు బాగా తెలుసు.

రియో ఒలింపిక్స్‌లో రెండు మెడల్స్ గెలిచినందుకే భారతీయులు తెగ ఆనందపడి పోతున్నారని ఓ బ్రిటిష్ జర్నలిస్ట్ హేళనగా మాట్లాడగా.. వీరూ తనదైన స్టయిల్లో అతడికి కౌంటర్ ఇచ్చాడు. మేం ప్రతి చిన్న సంఘటనను సెలబ్రేట్ చేసుకుంటాం. అయినా ఆటను కనిపెట్టిన వాళ్లు వరల్డ్ కప్ కొట్టలేకపోయారు. మేం మీలా కాదంటూ.. వీరూ కౌంటర్ ఇవ్వడంతో సదరు జర్నలిస్టు నోరు మూసుకున్న సంగతి తెలిసిందే.

ఇటీవలే ఓ అరబ్ న్యూస్ వెబ్‌సైట్ ధోనీ ఫొటో బదులు ఎంఎస్ ధోనీ సినిమాలో హీరోగా నటించిన సుశాంత్ సింగ్ రాజ్‌పుత్ ఫొటో ఉంచిన విషయం గుర్తించిన వీరూ ఆ సంస్థకు తనదైన స్టయిల్లో షాకిచ్చాడు. 21 గజాల పిచ్‌పై వీరవిహారం చేసిన వీరూ ఇప్పుడు 140 పదాల పిచ్‌పై కూడా తనదైన స్టయిల్లో చెలరేగుతూ లక్షలు పోగేస్తున్నాడు.