పుజారా రనౌట్‌పై పంచ్‌లేసిన సెహ్వాగ్

దక్షిణాఫ్రికాతో జరుగుతున్న రెండో టెస్ట్ తొలి ఇన్నింగ్స్‌లో భారత్ వరుస బంతుల్లో రెండు వికెట్లు కోల్పోయి కష్టాల్లో పడింది. తొలి ఇన్నింగ్స్‌లో దక్షిణాఫ్రికా 335 పరుగులకు ఆలౌట్ కాగా.. భారీ లక్ష్యంతో బరిలో దిగిన భారత జట్టుకు ఆరంభంలోనే ఎదురుదెబ్బ తగిలింది. మోర్కెల్ బౌలింగ్‌లో నిర్లక్ష్యంగా ఆడిన ఓపెనర్ రాహుల్ (10) అతడికే క్యాచ్ ఇచ్చి వెనుదిరిగాడు. మరుసటి బంతికే భారత్‌కు మరో భారీ షాక్ తగిలింది. అనవసరమైన పరుగు కోసం యత్నించిన ఛటేశ్వర్ పుజారా రనౌట్ అయ్యాడు.

పుజారా వేగంగా పరిగెత్తేలోపే దక్షిణాఫ్రికా ఫీల్డర్ లుంగి ఎన్గిడి డైరెక్ట్ త్రో విసిరాడు. దీంతో వన్‌డౌన్‌లో వచ్చిన పుజారా గోల్డెన్ డక్‌గా వెనుదిరిగాడు. దీంతో భారత్ 28 పరుగులకే రెండు కీలక వికెట్లు కోల్పోయి కష్టాల్లో పడింది. దక్షిణాఫ్రికా తరఫున వన్‌డౌన్‌లో బ్యాటింగ్‌కు దిగిన ఆమ్లా కూడా రనౌట్ అయిన సంగతి తెలిసిందే.

చివరగా గతేడాది ఆస్ట్రేలియాపై ధర్మశాల టెస్టులో డకౌట్ అయిన పుజారా ఆ టెస్టులోనూ రనౌట్ కావడం గమనార్హం. ఇటీవల టెస్టుల్లో భారత తరఫున అత్యధికసార్లు రనౌట్ అయిన బ్యాట్స్‌మెన్ పూజరానే. ఇటీవలి కాలంలో ఆరుగురు భారత బ్యాట్స్‌మెన్ రనౌట్ కాగా, పుజారానే మూడుసార్లు రనౌట్ అయ్యాడు. పుజారా క్రీజులో ఉండగా.. మరో ఇద్దరు బ్యాట్స్‌మెన్ రనౌట్‌గా వెనుదిరిగారు.

Lungi dance karega ya lungi ko hamaare batsman dance karenge. #LungiDance — Virender Sehwag (@virendersehwag) January 14, 2018
అద్భుతమైన త్రో విసిరిన లుంగీ ఎన్గిడీ.. పుజారాను రనౌట్ చేయడం పట్ల మాజీ క్రికెటర్ వీరేంద్ర సెహ్వాగ్ తనదైన శైలిలో స్పందించాడు. తను లుంగీ డ్యాన్స్ చేస్తాడా..? మన బ్యాట్స్‌మెన్ చేయిస్తాడా అని ట్వీట్ చేశాడు.