మరో ఐదేళ్లు వివో చేతిలోనే ఐపీఎల్!

ఇండియన్ ప్రీమియం లీగ్ (ఐపీఎల్) బిజినెస్ దేశంలో ఏ రేంజులో ఉందో చైనా మొబైల్ కంపెనీ ‘వివో’కి అర్థమైపోయింది. అందుకే పట్టువదలని విక్రమార్కుడిలా మరో ఐదేళ్లపాటు ఐపీఎల్ స్పాన్సర్‌షిప్ హక్కులను సొంతం చేసుకుంది. ఐపీఎల్ 2016, 2017 సీజన్‌‌లకు స్పాన్సర్‌గా వ్యవహరించిన వివో.. ఇప్పుడు ఏకంగా రూ. 2199 కోట్లు వెచ్చించి ఐదేళ్ల సమయానికి స్పాన్సర్‌షిప్‌ను దక్కించుకుంది. అంటే ఒక్కో సీజన్‌కు సుమారు రూ. 440 కోట్లు.

2017 ఆగస్టు 1 నుంచి 2022 జులై 31 వరకు ఐదేళ్ల పాటు ఐపీఎల్ స్పాన్సర్‌షిప్ హక్కుల కోసం బీసీసీఐ టెండర్ అప్లికేషన్లను ఆహ్వానించింది. ఈ వేలంలో వివోకి పోటీగా మరో చైనా మొబైల్ కంపెనీ ఒప్పో పాల్గొంది. కానీ రూ. 1430 కోట్లు మాత్రమే బిడ్ వేసి రెండో స్థానంలో నిలిచింది. వాస్తవానికి 2013లో ఐపీఎల్ స్పాన్సర్‌షిప్‌ను పెప్సికో కంపెనీ రూ. 396 కోట్లకు సొంతం చేసుకుంది. ఇది కూడా ఐదేళ్ల కాంట్రాక్ట్. దీంతో పోలిస్తే.. ప్రస్తుతం వివో ఐదున్నర రెట్లు అధికంగా చెల్లిస్తోంది.
VIVO retains title sponsorship for IPL 2018-22. They bid Rs.2,199 Crores, 554% increase over the previous contract! pic.twitter.com/6D7RXooTvB — IndianPremierLeague (@IPL) June 27, 2017
2016, 2017 సీజన్లలో సంవత్సరానికి స్పాన్సర్‌షిప్ కోసం వివో రూ. 100 కోట్లు చెల్లించినట్లు సమాచారం. ఆ లెక్కన చూసుకున్నా ప్రస్తుతం చెల్లించేది చాలా ఎక్కవే. భారత మార్కెట్‌పై కన్నేసిన చైనా కంపెనీలు వివో, ఒప్పో ఎలాగైనా ఇక్కడ వ్యాపారాన్ని పెంచాలని చూస్తున్నాయి. దీనిలో భాగంగానే భారతీయులు మతంగా భావించే క్రికెట్‌ను ఆయుధంగా ఎంచుకున్నాయి. ఇప్పటికే భారత క్రికెట్ టీం స్పాన్సర్‌షిప్‌ను ఒప్పో సొంతం చేసుకుంది. ఇప్పుడు ఐపీఎల్ స్పాన్సర్‌షిప్‌ను వివో లాక్కుంది.