ధోనీ దగ్గర నేర్చుకున్నా.. ఇప్పుడు కోహ్లి

ఐపీఎల్ 2018 సీజన్‌లో భారత కెప్టెన్ విరాట్ కోహ్లితో డ్రెస్సింగ్ రూము‌ని పంచుకునే అవకాశం దక్కుతున్నందుకు చాలా సంతోషంగా ఉందని యువ ఆల్‌రౌండర్ వాషింగ్టన్ సుందర్ వెల్లడించాడు. బెంగళూరు వేదికగా గత శని, ఆదివారం జరిగిన ఐపీఎల్ ఆటగాళ్ల వేలంలో వాషింగ్టన్ సుందర్‌ని రూ.3.3కోట్లకి రాయల్ ఛాలెంజర్స్ బెంగళూరు ఫ్రాంఛైజీ కొనుగోలు చేసిన విషయం తెలిసిందే. గత ఏడాదే ఐపీఎల్‌లోకి అరంగేట్రం చేసిన సుందర్.. రైజింగ్ పుణె సూపర్ జెయింట్స్ తరఫున 11 మ్యాచ్‌లాడి 7 వికెట్లు పడగొట్టాడు. ఈ ప్రదర్శనతోనే టీమిండియా నుంచి పిలుపురాగా.. గత ఏడాది చివర్లో శ్రీలంకతో జరిగిన వన్డే, టీ20 సిరీస్‌లో‌ బంతితో సత్తాచాటాడు.

బెంగళూరు ఫ్రాంఛైజీ తనని వేలంలో కొనుగోలు చేయడంపై వాషింగ్టన్ సుందర్ మీడియాతో సోమవారం మాట్లాడాడు. ‘చాలా ఆనందంగా ఉంది. నేను విరాట్ కోహ్లి, ఏబీ డివిలియర్స్‌కి పెద్ద అభిమానిని. గత ఏడాది మహేంద్రసింగ్ ధోనీతో కలిసి పుణె జట్టులో ఆడాను. ఆ అనుభవం చాలా నేర్పింది. ఇప్పుడు కోహ్లి, డివిలియర్స్‌తో కలిసి డ్రెస్సింగ్‌ రూముని పంచుకోబోతున్నా. ప్రాక్టీస్, మ్యాచ్ సమయంలో వారిని దగ్గర నుంచి గమనిస్తూ నేర్చుకునే అవకాశం నాకు దక్కబోతోంది. టోర్నీలో నాకు దొరికే అవకాశాన్ని అందిపుచ్చుకుని మెరుగైన ప్రదర్శన చేసేందుకు ప్రయత్నిస్తా’ అని సుందర్ వెల్లడించాడు.