నిర్లక్ష్యానికి మూల్యం పాండ్యా రనౌట్

అప్పటికే జట్టు పీకల్లోతు కష్టాల్లో ఉంది. క్రీజులో ఉన్న కెప్టెన్ విరాట్ కోహ్లీకి అండగా నిలిచే మరో బ్యాట్సమన్ కరువయ్యాడు. కీపర్ వృద్ధిమాన్ సాహా స్థానంలో జట్టులోకి వచ్చిన పార్థివ్ పటేల్ కూడా ఎక్కువ సేపు క్రీజులో నిలవలేకపోయాడు. అలాంటి పరిస్థితుల్లో క్రీజులోకి వచ్చాడు.. మన బెస్ట్ ఆల్‌రౌండర్ హార్దిక్ పాండ్యా. మూడో రోజు కోహ్లీకి అండగా నిలుస్తాడని.. జట్టుకు ఆదుకుంటాడని చాలా మంది భారత అభిమానులు ఊహించుకునే ఉంటారు. కానీ అనూహ్యంగా రనౌటై షాకిచ్చాడు. నిర్లక్ష్యంగా వ్యవహరించి వికెట్ సమర్పించుకున్నాడు. ఇప్పుడు క్రికెట్ అభిమానుల నుంచి విమర్శలు ఎదుర్కొంటున్నాడు.

అసలేం జరిగిందంటే..
సెంచూరియన్‌లోని సూపర్‌స్పోర్ట్ పార్క్ వేదికగా భారత్, దక్షిణాఫ్రికా జట్ల మధ్య రెండో టెస్టు జరుగుతున్న సంగతి తెలిసిందే. 183/5 ఓవర్‌నైట్ స్కోరుతో మూడోరోజు ఆట ఆరంభించిన భారత్‌కు ఆదిలోనే పెద్ద దెబ్బ తగిలింది. రనౌట్ రూపంలో హార్దిక్ పాండ్యా (15) పెవిలియన్‌కు చేరాడు. రబాడా వేసిన బంతిని స్టైట్‌గా ఆడిన పాండ్యా.. సింగిల్ కోసం ప్రయత్నించాడు. అయితే అవతలి ఎండ్‌లో ఉన్న కెప్టెన్ కోహ్లి వెనక్కి వెళ్లాలని సూచించాడు. వెంటనే వెనక్కి తిరిగిన పాండ్యా నెమ్మదిగా పరిగెత్తుతూ క్రీజులోకి చేరాడు. అయితే తన బ్యాటును ముందుగా క్రీజులో ఉంచలేదు. ఈ లోపల ఫిలాండర్ విసిరిన త్రో వికెట్లను గిరాటేసింది. బాల్ వికెట్లను తాకే సమయానికి పాండ్యా క్రీజులోకి వచ్చినప్పటికీ అతని కాలు, బ్యాటు గాల్లో ఉన్నాయి. దీంతో థర్డ్ అంపైర్ ఔట్‌గా ప్రకటించారు.
Today Hardik Pandya proved he is more dumber than Alia Bhatt. #SAvIND pic.twitter.com/xcpjuHDKDA — Waѕiyullah Budye (@WasiyullahB) January 15, 2018
కేవలం పాండ్యా నిర్లక్ష్యంగా వ్యవహరించడం వల్లే రనౌట్ అయినట్లు రీప్లేలో స్పష్టంగా తెలుస్తోంది. ఈ వీడియో సోషల్ మీడియాలో దర్శనమీయడంతో భారత అభిమానులు పాండ్యాపై విరుచుకుపడుతున్నారు. విమర్శలు గుప్పిస్తున్నారు. మరోవైపు కెప్టెన్ విరాట్ కోహ్లి టెస్టుల్లో 21వ సెంచరీని నమోదు చేశాడు.