భారత్ వికెట్లు ఇంకా పడాలనుకున్నా..! : బుమ్రా

మెల్‌బోర్న్ వేదికగా ఆస్ట్రేలియాతో జరుగుతున్న మూడో టెస్టు మ్యాచ్‌లో ఈరోజు భారత్ వికెట్లు ఇంకా పడింటే బాగుండేదని ఫాస్ట్ బౌలర్ జస్‌ప్రీత్ బుమ్రా అభిప్రాయపడ్డాడు. ఆటలో మూడో రోజైన శుక్రవారం 8/0తో తొలి ఇన్నింగ్స్‌ను కొనసాగించిన ఆస్ట్రేలియా జట్టు.. జస్‌ప్రీత్ బుమ్రా (6/33) ధాటికి 151 పరుగులకే కుప్పకూలిపోయింది. దీంతో.. 292 పరుగుల తొలి ఇన్నింగ్స్ ఆధిక్యాన్ని అందుకున్న భారత్ జట్టు ఈరోజు ఆట ముగిసే సమయానికి రెండో ఇన్నింగ్స్‌లో పేలవంగా వికెట్లు చేజార్చుకుని 54/5తో నిలిచింది. అయితే.. ఇప్పటికే 346 పరుగుల భారీ ఆధిక్యం లభించడంతో ఈరోజు ఇంకా కొన్ని వికెట్లు పడుంటే బాగుండేదని బుమ్రా చెప్పుకొచ్చాడు.

‘మెల్‌బోర్న్‌లో మరింత ఆత్మవిశ్వాసంతో క్రికెట్ ఆడాలనుకుంటున్నాం. ఈరోజే ఇంకొన్ని వికెట్లు పడుంటే బాగుండేదని నాకు అనిపించింది. శనివారం తొలి సెషన్‌లో మరికొన్ని పరుగులు జోడించి.. ఆ తర్వాత ఆస్ట్రేలియాని ఆలౌట్ చేసేందుకు ఉపక్రమిస్తాం’ అని జస్‌ప్రీత్ బుమ్రా వెల్లడించాడు. పిచ్ బౌలింగ్‌కి అతిగా అనుకూలిస్తున్న నేపథ్యంలో.. 300పైచిలుకు లక్ష్యం ఛేదించడం కత్తిమీద సామే. ఈ నేపథ్యంలోనే.. ఇప్పటికే 346 ఆధిక్యంలో ఉన్న భారత్ వేగంగా ఆలౌట్ అయితే.. రెండో ఇన్నింగ్స్‌లోనూ కంగారూలను బెంబేలెత్తించొచ్చని బుమ్రా ఆలోచన కాబోలు..!!