గువహటిలో ఆసీస్ వ్యూహం ఎదురుదాడే..?

భారత్‌తో గువహటి వేదికగా మంగళవారం జరగనున్న రెండో టీ20లో ఎదురుదాడే వ్యూహంగా ఆస్ట్రేలియా బరిలోకి దిగనుందని ఆ జట్టు తాత్కాలిక కెప్టెన్ డేవిడ్ వార్నర్ వెల్లడించాడు. రాంచీ వేదికగా జరిగిన తొలి టీ20లో 10 ఓవర్ల వరకూ మెరుగ్గా రాణించిన ఆ జట్టు చివర్లో మాత్రం ఘోరంగా తడబడింది. వరుస ఓవర్లలో వికెట్లు చేజార్చుకుని తక్కువ స్కోరుకే పరిమితమైంది. కానీ.. రెండో టీ20లో మాత్రం విమర్శలు పట్టించుకోకుండా ఆసీస్ తరహా క్రికెట్ ఆడతామని వార్నర్ ధీమా వ్యక్తం చేశాడు.

‘రెండో టీ20లో వంద శాతం మెరుగైన ప్రదర్శన చేసేందుకు ప్రయత్నిస్తాం. తొలి టీ20 గురించి అతిగా ఏమీ మేము చింతించడం లేదు. ఆరంభంలోనే మెరుగైన భాగస్వామ్యం వచ్చినా సద్వినియోగం చేసుకోలేకపోయాం. ఎవరూ కూడా తొందరగా ఔటైపోవాలని కోరుకోరు. కానీ.. రాంచీ‌లో అలా జరిగిపోయింది. కొంతమంది ఆస్ట్రేలియా ఒత్తిడిలో ఉందని.. ఇద్దరు ఆటగాళ్లపైనే ఆధారపడుతోందనే విమర్శలు చేస్తున్నారు. సవాళ్లు ఎదురైనప్పుడు ధీటుగా నిలబడి జట్టుగా విజయం సాధించడం ఆసీస్ తరహా క్రికెట్’ అని వార్నర్ ధీమా వ్యక్తం చేశాడు. భుజం గాయం కారణంగా కెప్టెన్ స్టీవ్‌స్మిత్ ఆదివారం ఆస్ట్రేలియాకి వెళ్లిపోయాడు.