Kieron Pollardని కామెడీగా కవ్వించిన రోహిత్ (వీడియో)

భారత ఓపెనర్ రోహిత్ శర్మ, వెస్టిండీస్ కెప్టెన్ కీరన్ పొలార్డ్ మధ్య గత కొద్దిరోజులుగా కవ్వింపులు కొనసాగుతున్నాయి. మైదానంలోనే కాకుండా.. వెలుపల కూడా ఈ ఇద్దరూ సరదాగా కవ్వింపులకి దిగారు. భారత్ పర్యటనకి వెస్టిండీస్ టీమ్ వచ్చే ముందు.. రోహిత్ శర్మని ట్విట్టర్‌లో అన్‌ఫాలో కావడం ద్వారా ఈ సరదాగా గొడవకి కీరన్ పొలార్డ్ తెరదీశాడు. ఆ తర్వాత పొలార్డ్‌ని ఎయిర్‌ పోర్ట్ నుంచి ఫికప్ చేసుకుని మధ్యలో వదిలేయడం, అతను నిద్రపోతున్న బెడ్‌ కింద పిల్లలు ఆడుకునే బొమ్మలు ఉంచడం ద్వారా రోహిత్ శర్మ బదులు తీర్చుకున్నాడు. పొలార్డ్, రోహిత్ మధ్య సరదా కవ్వింపులను స్టార్ స్పోర్ట్స్ ఛానల్ సిరీస్ ప్రచారం కోసం బాగా వాడేసుకుంది.


చెపాక్ వేదికగా ఆదివారం జరిగిన తొలి వన్డే మ్యాచ్‌లో బ్యాటింగ్ చేస్తూ ఓవర్ మధ్యలో కీరన్ పొలార్డ్‌ వద్దకి వెళ్లిన రోహిత్ శర్మ ఏదో ఫేవర్‌ చేయమని అడిగినట్లు కనిపించింది. రోహిత్ ప్రతిపాదనపై కీరన్ పొలార్డ్ కవ్వింపుగా నడుం, భుజాల్ని ఊపుతూ అక్కడ నుంచి వెళ్లిపోయాడు. దీంతో.. నవ్వుకుంటూ మళ్లీ క్రీజులోకి వచ్చిన రోహిత్ శర్మ తన బ్యాటింగ్‌ని కొనసాగించాడు. ఇప్పుడు ఈ వీడియో సోషల్ మీడియాలో వైరల్‌గా మారింది. ఐపీఎల్‌లో ముంబయి ఇండియన్స్ టీమ్‌కి ఈ ఇద్దరూ సుదీర్ఘకాలంగా ఆడుతున్న విషయం తెలిసిందే.


మ్యాచ్‌లో టాస్ ఓడి తొలుత బ్యాటింగ్ చేసిన భారత్ జట్టు 8 వికెట్ల నష్టానికి 287 పరుగులు చేయగా.. లక్ష్యాన్ని 47.5 ఓవర్లలోనే వెస్టిండీస్ 291/2తో ఛేదించేసింది. పిచ్‌పై బంతి ఆగి నెమ్మదిగా బ్యాట్‌పైకి రావడంతో 56 బంతులాడిన రోహిత్ శర్మ 6x4 సాయంతో 36 పరుగులు చేసి ఔటయ్యాడు. మరోవైపు మ్యాచ్‌లో 4 ఓవర్లు బౌలింగ్ చేసిన పొలార్డ్ 28 పరుగులిచ్చి.. రిషబ్ పంత్ వికెట్ పడగొట్టాడు. ఇక భారత్, వెస్టిండీస్ మధ్య విశాఖపట్నం వేదికగా బుధవారం రెండో వన్డే మ్యాచ్ జరగనుంది.