అర్జున్ తెందుల్కర్ యార్కర్.. క్రికెటర్‌కి గాయం

మైదానంలో దాదాపు రెండు దశాబ్దాల పాటు మాస్టర్ బ్లాస్టర్ సచిన్ తెందుల్కర్ తన దూకుడుతో ఇంగ్లాండ్ క్రికెటర్లని ఆటాడుకున్నాడు. ఇప్పుడు మళ్లీ ‘తెందుల్కర్’ అని పేరు వినిపిస్తేనే వాళ్లు హడిలిపోతున్నారు. దానికి కారణం యువ అర్జున్ తెందుల్కర్. నెట్స్‌లో పదునైన యార్కర్ బంతులు విసురుతూ అగ్రశ్రేణి అంతర్జాతీయ బ్యాట్స్‌మెన్‌కి సైతం వణుకు పుట్టిస్తున్నాడట ఈ ఎడమచేతి వాటం పేస్ బౌలర్. గత కొద్ది రోజులుగా ఇంగ్లాండ్‌లోనే ఉంటూ క్రికెట్‌పై శిక్షణ తీసుకుంటున్నాడు అర్జున్.

దక్షిణాఫ్రికాతో టెస్టు సిరీస్ ఆరంభంకానున్న నేపథ్యంలో ఇంగ్లాండ్ క్రికెటర్లు లార్డ్స్ మైదానంలోని నెట్స్‌లో ప్రాక్టీస్ చేస్తుండగా.. అక్కడికి వచ్చిన అర్జున్ తెందుల్కర్ కాసేపు బౌలింగ్ చేశాడట. అయితే అర్జున్ వేసిన తొలి యార్కర్ బంతినే ఇంగ్లాండ్ వికెట్ కీపర్/ బ్యాట్స్‌మెన్ బారిస్టో అడ్డుకోలేక గాయపడినట్లు డెయిలీ మెయిల్ కథనాన్ని ప్రచురించింది. నొప్పితో విలవిలలాడిపోయిన బారిస్టో ప్రాథమిక చికిత్స తర్వాత తొలి టెస్టుకి అందుబాటులోనే ఉన్నట్లు ఇంగ్లాండ్ ప్రకటించింది. ఎడమచేతి వాటం పేస్ బౌలింగ్‌తో పాటు.. ఎడమచేతి వాటం బ్యాటింగ్‌తో ఆల్‌రౌండర్‌గా గత కొంతకాలంగా అర్జున్ తెందుల్కర్ అందర్నీ ఆకర్షిస్తున్నాడు. ఇప్పటికే ముంబయి అండర్ -14, అండర్ -16 జట్ల తరఫున మెరుగైన ప్రదర్శన చేశాడు.