యాప్నగరం

ధోనీకి చురకలు అంటించిన గవాస్కర్..!

ఒకవేళ ధోనీ.. ఆస్ట్రేలియా‌తో జనవరిలో జరగనున్న వన్డే సిరీస్‌.. ఆ తర్వాత న్యూజిలాండ్‌‌పైనా ఫెయిలైతే..? వన్డే ప్రపంచకప్‌‌‌కి అతడ్ని ఎంపిక చేయగలరా..? -గవాస్కర్

Samayam Telugu 4 Dec 2018, 2:49 pm
ఆస్ట్రేలియా పర్యటనకి దూరమై ప్రస్తుతం విశ్రాంతి తీసుకుంటున్న భారత మాజీ కెప్టెన్ మహేంద్రసింగ్ ధోనీపై దిగ్గజ క్రికెటర్ సునీల్ గవాస్కర్ తీవ్ర విమర్శలు గుప్పించాడు. ఈ ఏడాది మధ్యలో ముగిసిన ఇంగ్లాండ్ పర్యటనలో విఫలమైన ధోనీ.. ఆ తర్వాత ఆసియా కప్, వెస్టిండీస్‌పైనా చెప్పుకోదగ్గ స్కోర్లు చేయలేకపోయాడు. దీంతో.. వెస్టిండీస్‌, ఆస్ట్రేలియాతో ఇటీవల ముగిసిన టీ20 సిరీస్‌ల నుంచి ధోనీని తప్పించిన సెలక్టర్లు.. అతని స్థానంలో యువ వికెట్ కీపర్ రిషబ్ పంత్‌కి జట్టులో ఛాన్సిచ్చారు. దీంతో.. వచ్చే ఏడాది జనవరి 12 వరకూ అంతర్జాతీయ క్రికెట్ ఆడే అవకాశం ధోనికి లేకపోయింది. అది కూడా.. ఆస్ట్రేలియా‌పై వన్డే సిరీస్‌కి ఎంపికైతేనే..!
Samayam Telugu 7


భారత్, ఆస్ట్రేలియా మధ్య గురువారం నుంచి నాలుగు టెస్టుల సిరీస్ మొదలుకానుండగా.. రిటైర్మెంట్ ప్రకటించి ఉండటంతో ధోని, పేలవ ఫామ్ కారణంగా వేటు పడటంతో శిఖర్ ధావన్‌లు ఈ సిరీస్‌కి దూరమయ్యారు. ఈ ఖాళీ సమయంలో ఇద్దరు క్రికెటర్లనీ దేశవాళీ క్రికెట్‌లో బీసీసీఐ లేదా సెలక్టర్లు ఎందుకు ఆడించడం లేదు..? అని గవాస్కర్ ప్రశ్నించాడు. వచ్చే ఏడాది ఆరంభంలో ఆస్ట్రేలియాతో వన్డే సిరీస్.. ఆ తర్వాత న్యూజిలాండ్‌తో సిరీస్, వన్డే ప్రపంచకప్ జరగనున్న నేపథ్యంలో.. ఫామ్ అందుకునేందుకు ఈ ఇద్దరు క్రికెటర్లనీ దేశవాళీ టోర్నీల్లో సెలక్టర్లు ఆడించాలని గవాస్కర్ సూచించాడు.

‘మహేంద్రసింగ్ ధోని ఇటీవల వెస్టిండీస్, ఆస్ట్రేలియాతో టీ20 సిరీస్‌లు ఆడలేదు. ఇక టెస్టులకి రిటైర్మెంట్ ప్రకటించి ఉండటంతో వాటిని ఆడే అవకాశం లేదు. ఈ లెక్కన చూస్తే.. అతను ఆఖరి మ్యాచ్ అక్టోబరులో ఆడాడు. ఇక తర్వాత మ్యాచ్ వచ్చే ఏడాది జనవరిలో ఆడనున్నాడు. ఈ మధ్యలో చాలా విరామ సమయం ఉంది. ఒకవేళ ధోనీ.. ఆస్ట్రేలియా‌తో వన్డే సిరీస్‌.. ఆ తర్వాత న్యూజిలాండ్‌‌పైనా ఫెయిలైతే..? వన్డే ప్రపంచకప్‌‌‌కి అతడ్ని ఎంపిక చేయగలరా..? ఒకవేళ సాహసించే చేస్తే..? తీవ్ర స్థాయిలో విమర్శలు ఎదుర్కోవాల్సి ఉంటుంది. కాబట్టి.. ధోనీ కూడా పెరుగుతున్న వయసు దృష్ట్యా.. విరామ సమయాల్లో ఖాళీగా ఉండకుండా దేశవాళీ క్రికెట్‌లో ఆడటం ఉత్తమం. అలా అయితేనే ఫామ్‌ అందుకుని.. మంచి ఇన్నింగ్స్‌లు ఆడగలడు. బీసీసీఐ కూడా ఆ దిశగా ఆలోచించి.. ధోని, ధావన్‌లు ఎందుకు దేశవాళీ క్రికెట్ ఆడటం లేదో ప్రశ్నించాలి’ అని గవాస్కర్ సూచించాడు.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.