ధోనీ హెల్మెట్‌పై త్రివర్ణ పతాకం ఎందుకుండదు?

టీమిండియా మాజీ కెప్టెన్ మహేంద్ర సింగ్ ధోనీ మైదానంలో ఉన్నప్పుడు ఎప్పుడైనా జాగ్రత్తగా గమనించారా? అతడి హెల్మెట్‌పై త్రివర్ణ పతాకం ఉండటం చూశారా..? ఇటీవలి కాలంలో అలా చూడలేదు కదూ. సచిన్, వీరేంద్ర సెహ్వాగ్ లాంటి ఆటగాళ్ల హెల్మెట్‌పై జాతీయ జెండా ఉంటుంది. ధోనీ కంటే వెనుక వచ్చిన కోహ్లి హెల్మెట్‌పై కూడా త్రివర్ణ పతాకం సగర్వంగా తలెత్తుకు కనిపిస్తుంది. మరి ధోనీ హెల్మెట్‌పై మాత్రం ఉండదు. ఎందుకో తెలుసా?

పద్నాలుగేళ్లుగా దేశానికి ప్రాతినిధ్యం వహిస్తోన్న ధోనీ హెల్మెట్‌పై త్రివర్ణ పతాకం లేకపోవడానికి ఓ కారణం ఉంది. చట్టం ప్రకారం జాతీయ జెండా ఉన్న వస్తువు ఏదైనా కింద ఉంచడం కుదరదు. అలా చేస్తే మన జెండాన్ని అవమానించినట్లే.

ధోనీ మైదానంలో బరిలో దిగినప్పుడు ఒక్కోసారి హెల్మెట్‌ను కింద ఉంచుతాడు. నిబంధనల ప్రకారం అలా ఉంచొద్దు. కాబట్టే.. తన హెల్మెట్‌పై జాతీయ జెండాను ఉంచుకోలేదు. 2011 వరకూ హెల్మెట్‌పై త్రివర్ణ పతాకాన్ని ఉంచిన ధోని, ఆర్మీ లెఫ్టినెంట్‌ హోదా పొందిన నాటి నుంచి దాన్ని పక్కనబెట్టాడు. ఇతర క్రికెటర్లు తమ హెల్మెట్‌పై త్రివర్ణ పతాకాన్ని ఉంచుకోవడం ద్వారా దేశభక్తి చాటుకుంటే.. ధోనీ మాత్రం జాతీయ జెండాను హెల్మెట్‌పై ఉంచుకోకుండానే.. తన దేశభక్తిని చాటుకున్నాడు.