నా కెప్టెన్సీలో ధోనీ 2003 ప్రపంచ కప్ ఆడి ఉంటే?

సౌరభ్ గంగూలీ నాయకత్వంలోని భారత క్రికెట్ జట్టు 2003 ప్రపంచ కప్ ఫైనల్ చేరిన సంగతి అభిమానులందరికీ గుర్తే. టోర్నీ ఆసాంతం అద్భుతమైన ఆటతీరు కనబర్చిన టీమిండియా ఫైనల్లో ఆస్ట్రేలియా చేతిలో ఓటమిపాలైంది. ప్రతి జట్టుపై ఆధిపత్యం చెలాయించిన భారత్ ఆసీస్‌తో జరిగిన ఫైనల్లో తడబడింది. చరిత్ర సృష్టించే అవకాశాన్ని తృటిలో కోల్పోయింది. అలాంటి టోర్నీలో మహేంద్ర సింగ్ ధోనీ లాంటి ఆటగాడు ఉండి ఉంటే..?

ఈ మాటలు అన్నది ఎవరో కాదు. అప్పటి జట్టుకు నాయకత్వం వహించిన సౌరభ్ గంగూలీనే. ధోనీని వెలుగులోకి తెచ్చింది గంగూలీ అనే సంగతి తెలిసిందే. 2004లో అతడు భారత క్రికెట్ జట్టులో చోటు సంపాదించాడు. ఒక్క ఏడాది ముందుగా.. మహీ జట్టులోకి వచ్చి ఉంటే.. 2003 ప్రపంచ కప్ ఆడి ఉంటే జట్టు ప్రదర్శనలో తేడా కచ్చితంగా కనిపించేదని గంగూలీ అభిప్రాయపడ్డాడు.

టీమిండియా ప్రపంచ కప్ ఫైనల్ ఆడుతున్న సమయానికి ధోనీ రైల్వేలో టికెట్ కలెక్టర్‌గా పని చేస్తున్నాడు. ఈ విషయాన్ని నమ్మకలేకపోతున్నా అని తన ఆటోబయోగ్రఫీ ‘వన్ సెంచరీ ఈజ్ నాట్ ఇనఫ్‌‌’లో రాసుకొచ్చాడు.

ఏదేమైనా మహీ విషయంలో నా అంచనా నిజమైంది. తొలి రోజు నుంచే అతడి ఆటతీరు నన్ను ఆకట్టుకుంది. ధోనీ ప్రపంచ స్థాయి ఆటగాడిగా ఎదిగాడని దాదా సంతోషం వ్యక్తం చేశాడు. అతడు ఈ రోజేంటో అందరికీ తెలిసిందే. జట్టుకు ఎన్నో చిరస్మరణీయ విజయాలను అందించాడని ధోనీపై ప్రశంసల వర్షం కురిపించాడు.

గంగూలీపై ఎంతో గౌరవం కనబరిచే ధోనీ.. అతడి రిటైర్మెంట్ మ్యాచ్‌లో దాదాకు ఆఖరిసారిగా కెప్టెన్సీ పగ్గాలు అప్పగించాడు. నాయకత్వ బాధ్యతలను ముందుగా కాదనప్పటికీ.. తర్వాత మాత్రం నో చెప్పలేకపోయానని బెంగాల్ నవాబ్ చెప్పాడు. కానీ మూడు ఓవర్లు కెప్టెన్సీ చేసే సరికి ఏకాగ్రత చూపడం కష్టమైంది. దీంతో మహీకే ఆ బాధ్యతలు అప్పగించాను. ధోనీ.. ఇది నీ పని అని చెప్పాక.. ఇద్దరం నవ్వుకున్నామని గంగూలీ తన ఆత్మకథలో రాసుకొచ్చాడు.