‘పెళ్లాడతానని నమ్మించి.. పదేళ్లు లైంగికంగా వాడుకున్నాడు’.. పాక్ కెప్టెన్‌‌పై మహిళ ఆరోపణలు

పాకిస్థాన్ కెప్టెన్ బాబర్ ఆజమ్‌పై ఓ మహిళ సంచలన ఆరోపణలు చేసింది. పెళ్లి చేసుకుంటానని నమ్మించి పదేళ్లుగా బాబర్ తనను లైంగికంగా వాడుకుంటున్నాడని ఆరోపించింది. శనివారం మీడియా ముందుకొచ్చిన ఆ మహిళ బాబర్‌పై లైంగిక ఆరోపణలు చేయడం గమనార్హం. బాబర్ ఆర్థిక ఇబ్బందుల్లో ఉన్నప్పుడు తాను డబ్బు సాయం చేశానని కూడా ఆమె తెలిపింది.

తామిద్దరం స్కూల్ ఫ్రెండ్స్‌మని చెప్పిన ఆ మహిళ.. తాను పెళ్లాడతానని 2010లో ఆజమ్ ప్రపోజ్ చేశాడని చెప్పింది. కానీ తర్వాత బాబర్ మనసు మార్చుకున్నాడని తెలిపింది. తను పోలీసులను సంప్రదించడానికి ముందు తనను చంపేస్తానని బాబర్ బెదిరించాడని ఆమె ఆరోపించింది. పేరు ప్రఖ్యాతులు రావడంతో ముఖం చాటేశాడని వాపోయింది. ఐసీసీ ప్లేయర్ ర్యాంకింగ్స్‌లో అన్ని ఫార్మాట్లలోనూ టాప్-5లో ఉన్న ఏకైక క్రికెటర్ బాబర్ ఆజమ్ మాత్రమే.

కాగా న్యూజిలాండ్ పర్యటనలో ఉన్న పాకిస్థాన్ క్రికెట్ జట్టులో ఏడుగురికి కరోనా పాజిటివ్ అని తేలిన సంగతి తెలిసిందే. దీంతో పాక్ క్రికెట్ జట్టులోని మిగతా ఆటగాళ్లు క్రైస్ట్‌చర్చిలోని హోటల్‌లో క్వారంటైన్లో ఉన్నారు. పాక్ క్రికెట్ జట్టు పదే పదే క్వారంటైన్ నిబంధనలను ఉల్లంఘించడంతో న్యూజిలాండ్ ఫైనల్ వార్నింగ్ ఇచ్చిన సంగతి తెలిసిందే.