పాక్ స్పిన్నర్ సంచలన ప్రదర్శన.. కివీస్ చెత్త రికార్డులు

దుబాయ్: పాకిస్థాన్ స్పిన్నర్ యాసిర్ షా మరోసారి మ్యాజిక్ చేశాడు. న్యూజిలాండ్‌తో జరుగుతోన్న రెండో టెస్టులో.. 12.3 ఓవర్లలో 41 పరుగులిచ్చి 8 వికెట్లు తీశాడు. యాసిర్ షా కెరీర్లో ఇదే అత్యుత్తమ బౌలింగ్ ప్రదర్శన కావడం విశేషం. ఓ దశలో 50/1తో నిలిచిన కివీస్.. షా దెబ్బకు 90 పరుగులకే కుప్పకూలింది. షా విజృంభించడంతో కివీస్ బ్యాట్స్‌మెన్ విలవిల్లాడారు. ఏకంగా ఆరుగురు బ్యాట్స్‌మెన్ డకౌట్‌గా వెనుదిరిగారు. కాలిన్ డి గ్రాండ్‌హోమ్‌ (0)ను హసన్ అలీ పెవిలియన్ చేర్చగా.. వాట్లింగ్‌ను హసన్ అలీ, యాసిర్ షా రనౌట్ చేశారు.

90 పరుగులకే ఆలౌట్ కావడం ద్వారా.. దుబాయ్‌లో అతి తక్కువ పరుగులు చేసిన జట్టుగా కివీస్ చెత్త రికార్డును మూటగట్టుకుంది. ఓపెనర్లు 50 పరుగుల భాగస్వామ్యం నెలకొల్పాక.. టెస్టుల్లో ఓ జట్టు చేసిన అత్యల్ప స్కోరు కూడా ఇదే కావడం గమనార్హం.

ఇన్నింగ్స్ 28వ ఓవర్లో యాసిర్ షా ఒక్క పరుగు కూడా ఇవ్వకుండా మూడు వికెట్లు తీసి న్యూజిలాండ్‌ను దెబ్బతీశాడు. అతడి ధాటికి కివీస్ 35.3 ఓవర్లలోనే 90 పరుగులకు ఆలౌటయ్యింది. అంతకు ముందు బ్యాటింగ్ చేసిన పాకిస్థాన్ 5 వికెట్ల నష్టానికి 418 పరుగుల వద్ద ఇన్నింగ్స్ డిక్లేర్ చేసింది.