Shubman Gill | టీమిండియా ఓపెనర్ శుభమన్ గిల్‌కి ఐసీసీ అవార్డ్.. సిరాజ్‌కి జస్ట్ మిస్!

భారత్ జట్టు యంగ్ ఓపెనర్ శుభమన్ గిల్‌ ( Shubman Gill)కి ఐసీసీ (ICC) అవార్డు దక్కింది. గత కొంతకాలంగా అంతర్జాతీయ క్రికెట్ కౌన్సిల్ (ఐసీసీ) ‘ప్లేయర్ ఆఫ్ ది మంత్’ (ICC Player of The Month) అవార్డుల్ని అందజేస్తోంది. ఈ క్రమంలో జనవరి నెలకిగానూ శుభమన్ గిల్‌కి ఈ అవార్డు దక్కింది. నిజానికి ఈ అవార్డు రేసులో హైదరాబాదీ క్రికెటర్ మహ్మద్ సిరాజ్ కూడా ఉన్నాడు. అలానే న్యూజిలాండ్ ఓపెనర్ దేవాన్ కాన్వె కూడా నామినేట్ అయ్యాడు. కానీ జనవరి నెలలో అత్యుత్తమ ప్రదర్శన కనబర్చిన 23 ఏళ్ల గిల్‌‌ని ఈ అవార్డ్ వరించింది. సిరాజ్‌కి కొద్దిలో ఈ అవార్డ్ మిస్ అయ్యింది. జనవరిలో పరుగుల వరద పారించిన శుభమన్ గిల్ 567 పరుగులు చేశాడు. ఇందులో మూడు సెంచరీలు ఉన్నాయి. అలానే న్యూజిలాండ్‌తో హైదరాబాద్ వేదికగా జరిగిన వన్డే మ్యాచ్‌లో 149 బంతుల్లో 208 పరుగులు చేశాడు. కెరీర్‌లో గిల్‌కి ఇదే తొలి డబుల్ సెంచరీ. అలానే శ్రీలంకపై 116, న్యూజిలాండ్‌పై ఆఖరి వన్డేలో 112 పరుగులు చేశాడు. 2022, అక్టోబరులో చివరిగా భారత్ తరఫున ఈ ఐసీసీ అవార్డ్‌ని విరాట్ కోహ్లీ దక్కించుకున్నాడు.

శుభమన్ గిల్ కెరీర్ బెస్ట్ ఫామ్‌లో ఉన్నా.. అతనిపై గత వారం టీమిండియా మేనేజ్‌మెంట్ వేటు వేసింది. ఆస్ట్రేలియాతో నాగ్‌పూర్ వేదికగా గత శనివారం ముగిసిన తొలి టెస్టులో కేఎల్ రాహుల్ కోసం గిల్‌ని పక్కనపెట్టారు. కానీ ఆ మ్యాచ్‌లో రాహుల్ ఘోరంగా విఫలమయ్యాడు. దాంతో మాజీ క్రికెటర్లు సైతం టీమిండియా మేనేజ్‌మెంట్ తీరుపై విమర్శలు గుప్పించారు. భారత మాజీ క్రికెటర్ వెంకటేశ్ ప్రసాద్ బాహాటంగానే రాహుల్ ఎంపిక ప్రదర్శన ఆధారంగా కాకుండా ఫేవరిటిజంతో జరిగిందని తేల్చేశాడు.

Read Latest Sports News, Cricket News, Telugu News