2019 ప్రపంచకప్ నా టార్గెట్: యువరాజ్

ఇంగ్లాండ్ వేదికగా వచ్చే ఏడాది జరగనున్న ప్రపంచకప్‌లో ఆడటమే తన తదుపరి లక్ష్యమని భారత వెటరన్ ఆల్‌రౌండర్ యువరాజ్ సింగ్ స్పష్టం చేశాడు. గత ఏడాదికాలంగా పేలవ ఫామ్‌, ఫిట్‌నెస్‌లేమి కారణంగా టీమిండియాలో చోటు దక్కించుకోలేకపోతున్న యువరాజ్ సింగ్.. ప్రస్తుతం దేశవాళీ టోర్నీ ‘విజయ్ హజారే ట్రోఫీ’లో ఆడుతున్నాడు. అయితే.. ఈ టోర్నీలోనూ ఇప్పటివరకు ఏడు మ్యాచ్‌లు ఆడిన యువీ పేలవంగా 264 పరుగులు మాత్రమే చేసి నిరాశపరిచాడు. దీంతో.. టీమిండియాలోకి అతని పునరాగమనం మరింత కష్టమైపోయింది. భారత జట్టు మిడిలార్డర్‌లో మనీశ్ పాండే, కేదార్ జాదవ్, కేఎల్ రాహుల్, దినేశ్ కార్తీక్, రిషబ్ పంత్‌ల మధ్య ఇప్పటికే తీవ్రమైన పోటీ నెలకొన్న విషయం తెలిసిందే.

‘భారత్ జట్టు తరఫున 2019 ప్రపంచకప్‌లో ఆడటమే నా లక్ష్యం. అందుకే అవకాశం దొరికిన మ్యాచ్‌ల్లో అత్యుత్తమంగా రాణించేందుకు ప్రయత్నిస్తున్నా. బ్యాటింగ్, బౌలింగ్, ఫీల్డింగ్‌, ఫిట్‌నెస్ ఇలా అన్ని అంశాల్లోనూ దృష్టి పెట్టాను. గత ఏడాది నేను ఆశించిన విధంగా దేశవాళీ క్రికెట్‌లో రాణించలేకపోయా. అలానే ఐపీఎల్ 2018 సీజన్‌లోనూ మెప్పించలేదే. ఇప్పుడు భారత్-ఎ జట్టు తరఫున ఆడి సెలక్టర్ల‌ని ఆకర్షించొచ్చు. కానీ.. అక్కడ ఆడి యువ క్రికెటర్ల అవకాశాల్ని దెబ్బతీయాలని అనుకోవట్లేదు. అందుకే.. ఇప్పుడు దేశవాళీ టీ20 టోర్నీమెంట్‌ ఆడేందుకు సిద్ధమవుతున్నా. చూడాలి ఇది నా కెరీర్‌ని గాడిన పడేస్తుందేమో..?’ యువరాజ్ సింగ్ వెల్లడించాడు.

మూడేళ్ల సుదీర్ఘ విరామం తర్వాత 2017 ఆరంభంలో భారత జట్టులోకి పునరాగమనం చేసిన యువరాజ్ సింగ్.. ఇంగ్లాండ్‌తో జరిగిన వన్డే మ్యాచ్‌లో 150 పరుగులతో సత్తాచాటాడు. దీంతో.. మళ్లీ అతని కెరీర్‌ గాడిన పడిందని అంతా అనుకున్నారు. కానీ.. గత ఏడాది మధ్యలో ముగిసిన ఛాంపియన్స్ ట్రోఫీ, వెస్టిండీస్ పర్యటనల్లో విఫలమైన యువీ.. మళ్లీ టీమిండియా దరిదాపుల్లోకి రాలేకపోయాడు.