పెళ్లి చేసుకున్న భారత స్పిన్నర్ చాహల్.. ఫస్ట్ ఫొటో విడుదల

టీమిండియా మణికట్టు స్పిన్నర్ చాహల్ ఓ ఇంటివాడయ్యాడు. ఈ ఏడాది ఆగస్టులో ధన్యశ్రీ వర్మతో ఎంగేజ్‌మెంట్ చేసుకున్న చాహల్.. తాజాగా ఆమెని పెళ్లి చేసుకున్నట్లు సోషల్ మీడియా ద్వారా ప్రకటించాడు. ఎంగేజ్‌మెంట్ తర్వాత ఐపీఎల్ 2020 సీజన్‌లో ఆడేందుకు యూఏఈకి వెళ్లిపోయిన చాహల్.. అట్నుంచి ఆస్ట్రేలియా పర్యటనకి వెళ్లి ఇటీవల భారత్‌కి తిరిగొచ్చాడు.

ముంబయిలో జన్మించిన ధన్యశ్రీ వర్మ.. ఒక డ్యాన్సర్, కొరియోగ్రాఫర్. అంతేకాకుండా తను యూట్యూబ్ ఛానల్‌ని కూడా నడుపుతోంది. ఆమె తండ్రి సాగర్ వర్మ బిజినెస్ మ్యాన్‌కాగా.. తల్లి వర్ష వర్మ డెంటిస్ట్‌గా పనిచేస్తోంది. దాంతో.. తొలుత డాక్టర్ కావాలని ఆశపడిన ధన్యశ్రీ.. ఆ తర్వాత డ్యాన్స్‌ని కెరీర్‌గా ఎంచుకుంది. సోషల్ మీడియాలో యాక్టివ్‌గా ఉండే ధన్యశ్రీకి పెద్ద సంఖ్యలోనే ఫాలోవర్లు ఉన్నారు.


భారత వన్డే, టీ20 జట్టులో రెగ్యులర్‌ స్పిన్నర్‌గా కొనసాగుతున్న చాహల్‌కి టెస్టుల్లో మాత్రం అవకాశాలు దక్కడం లేదు. అయినప్పటికీ నిరాశ చెందకుండా ఛాన్స్ దొరికిన మ్యాచ్‌లో సత్తా చాటుతున్నాడు. ఎంతలా అంటే..? ఆస్ట్రేలియాతో ఇటీవల ముగిసిన తొలి టీ20 మ్యాచ్‌లో రవీంద్ర జడేజా స్థానంలో కాంకషన్ సబ్‌స్టిట్యూట్ రూపంలో చాహల్‌ని టీమిండియా ఆడించగా.. మూడు వికెట్లతో జట్టుని గెలిపించాడు.