ఐపీఎల్ కోసమే టీ20 వరల్డ్‌కప్ వాయిదా.. మేము ఒప్పుకోం: పాక్ బోర్డు

భారత్‌లో జరిగే ఐపీఎల్ కోసం టీ20 వరల్డ్‌కప్‌ని ఐసీసీ వాయిదా వేయాలనుకోవడాన్ని తాము సమర్థించబోమని పాకిస్థాన్ క్రికెట్ బోర్డు (పీసీబీ) స్పష్టం చేసింది. ఆస్ట్రేలియా గడ్డపై అక్టోబరు 18 నుంచి నవంబరు 15 వరకూ టీ20 వరల్డ్‌కప్ జరగాల్సి ఉండగా.. కరోనా వైరస్ కారణంగా ఆ దేశంలో సెప్టెంబరు వరకూ లాక్‌డౌన్ అమల్లో ఉండనుండటంతో టోర్నీని 2022కి వాయిదా వేయాలని అంతర్జాతీయ క్రికెట్ కౌన్సిల్ (ఐసీసీ) ప్రాథమికంగా నిర్ధారించినట్లు వార్తలు వస్తున్నాయి. గురువారం సభ్య దేశాలతో సమావేశంకానున్న ఐసీసీ.. తుది నిర్ణయాన్ని ప్రకటించనుంది.

Read More:IND vs AUS టెస్టు సిరీస్ షెడ్యూల్ ఖరారు..!
టీ20 వరల్డ్‌కప్ వాయిదాపడితే..? ఆ అక్టోబరు - నవంబరు విండోలో ఐపీఎల్ 2020 సీజన్‌ని నిర్వహించాలని భారత క్రికెట్ నియంత్రణ మండలి (బీసీసీఐ) ఆశిస్తోంది. ఈ మేరకు ఇప్పటికే తెరవెనుక పావులు కదుపుతున్న బీసీసీఐ అధ్యక్షుడు సౌరవ్ గంగూలీ.. ఆస్ట్రేలియా, దక్షిణాఫ్రికా, శ్రీలంక తదితర దేశాల క్రికెట్ బోర్డుల మద్దతుని కూడా కూడగట్టుకున్నాడు. ఇక వెస్టిండీస్, బంగ్లాదేశ్, అఫ్గానిస్థాన్‌ లాంటి జట్లు ప్రస్తుత పరిస్థితుల్లో బీసీసీఐకి వ్యతిరేకంగా గళం విప్పే అవకాశం లేదు. దాంతో.. మొత్తంగా టీ20 వరల్డ్‌కప్ వాయిదాపడటం లాంఛనంగా మారింది.

Read More: బిషప్ దశాబ్దాపు వన్డే జట్టు కెప్టెన్‌గా ధోనీ.. మరో ఇద్దరికీ ఛాన్స్

టీ20 వరల్డ్‌కప్ వాయిదాపై వార్తలు వస్తుండటంతో పాకిస్థాన్ క్రికెట్ బోర్డు స్పందించింది. ‘‘మనం ఇంకా మే నెలలోనే ఉన్నాం.. కాబట్టి.. ఐసీసీ సభ్యదేశాలు టీ20 వరల్డ్‌కప్‌ విషయంలో కాస్త వెయిట్ చేస్తే బాగుంటుంది. కరోనా వైరస్ పరిస్థితి చూసి.. మరో రెండు నెలల తర్వాత నిర్ణయం తీసుకోవచ్చు. కానీ.. బీసీసీఐ నిర్వహించే ఓ దేశవాళీ ప్రైవేట్ టీ20 లీగ్ కోసం.. ఐసీసీ టీ20 వరల్డ్‌కప్‌ని వాయిదా వేయడమా..? ఆ నిర్ణయాన్ని పాకిస్థాన్ క్రికెట్ బోర్డు సపోర్ట్ చేయదు’’ అని పీసీబీ అధికారి ఒకరు తెలిపారు.