ఫిఫా కప్‌ ఫైనల్‌కి చేరిన క్రొయేషియా..!

రష్యా వేదికగా జరుగుతున్న ఫిఫా ప్రపంచకప్‌లో క్రొయేషియా జట్టు మళ్లీ మాయ చేసింది. టోర్నీ ఆరంభం నుంచి పెద్ద జట్లకి షాకిస్తూ.. అభిమానుల ఆదరణని చూరగొన్న క్రొయేషియా బుధవారం అర్ధరాత్రి జరిగిన సెమీ ఫైనల్‌ మ్యాచ్‌లో ఇంగ్లాండ్‌ జట్టునే మట్టికరిపించి ఫైనల్లో అడుగుపెట్టింది. సుదీర్ఘ చరిత్ర కలిగిన ఫిఫా ప్రపంచకప్‌లో క్రొయేషియా జట్టు ఫైనల్‌కి చేరడం ఇదే తొలిసారి కావడం విశేషం. ఫ్రాన్స్‌తో ఆదివారం రాత్రి జరగనున్న ఫైనల్ మ్యాచ్‌లో క్రొయేషియా తలపడనుంది.

మ్యాచ్ ఆరంభంలోనే ఇంగ్లాండ్‌కి 1-0తో ఆధిక్యం లభించింది. 5వ నిమిషంలో కీరన్‌ కళ్లు చెదిరే గోల్‌తో ఇంగ్లాండ్‌ జట్టులో ఉత్సాహం నింపాడు. ఆ తర్వాత క్రొయేషియా జట్టు ఆధిక్యాన్ని సమం చేసేందుకు చాలా ప్రయత్నించింది. కానీ.. ఇంగ్లాండ్ డిఫెన్స్‌ ఆ జట్టు ఆశలపై నీళ్లుచల్లుతూ వచ్చింది. అయితే.. మ్యాచ్‌ 68వ నిమిషంలో ఇవాన్ చూడచక్కని గోల్‌తో క్రొయేషియా‌‌ని ఊపిరి పీల్చుకునేలా చేశాడు. దీంతో.. మ్యాచ్ సమయం ముగిసే సరికి ఇరు జట్లూ 1-1తో సమంగా నిలవడంతో.. అదనపు సమయం కేటాయించారు. ఈ దశలో గోల్‌ కోసం ఇరు జట్ల ఆటగాళ్లు తీవ్రంగా ప్రయత్నించినా.. మ్యాచ్‌ 109వ నిమిషంలో మారియో సూపర్ గోల్‌తో క్రొయేషియా‌ని గెలుపు సంబరాల్లో ముంచెత్తాడు.