ఆటతో బెల్జియం గెలిచింది.. క్రమశిక్షణతో జపాన్ ఫ్యాన్స్‌ గెలిచారు

ఫుట్‌బాల్ ప్రపంచకప్‌లో జపాన్ పోరాటం ముగిసింది. బెల్జియం చేతిలో ఆ జట్టు 2-3 గోల్స్ తేడాతో ఓటమి పాలైంది. జపాన్ 2-0 ఆధిక్యంలో ఉన్న దశలో బెల్జియం అద్భుతంగా పుంజుకొని 3-2 తేడాతో విజయం సాధించింది. గెలుస్తామనుకున్న మ్యాచ్‌లో ఓడటంతో జపాన్ ఆటగాళ్లు తీవ్ర నిరాశకు గురయ్యారు. తమ జట్టు క్వార్టర్స్ చేరుతుందని ఆశించిన జపానీయులు నిరుత్సాహపడ్డారు.

ఈ మ్యాచ్‌లో అద్భుతంగా పుంజుకొని అసాధారణ ఆటతీరుతో బెల్జియం ఆటగాళ్లు ఆకట్టుకోగా.. జపాన్ అభిమానులు తమ ప్రవర్తనతో ప్రపంచాన్ని ముగ్ధుల్ని చేశారు. తమ ఆటగాళ్లు చేజేతులా మ్యాచ్ ఓడితే ఆగ్రహం వ్యక్తం చేయకపోగా.. మ్యాచ్ ముగిశాక బాటిళ్లు, ఇతర వస్తువులను ఏరి స్టేడియాన్ని శుభ్రం చేశారు. క్రమశిక్షణకు మారుపేరైన జపనీయులు మరోసారి తామేంటో నిరూపించుకున్నారు. జపాన్ ఓడినా.. ఫ్యాన్స్ మాత్రం అందరికీ ఆదర్శంగా నిలిచారంటూ ప్రపంచవ్యాప్తంగా నెటిజన్లు ప్రశంసలు కురిపిస్తున్నారు.

సోమవారం ఉత్కంఠ భరితంగా సాగిన మ్యాచ్‌లో తొలి అర్ధభాగంలో జపాన్, బెల్జియం జట్లు ఒక్క గోల్‌ కూడా చేయలేదు. కానీ మలి అర్ధ భాగం ఆరంభమైన కాసేపటికే జపాన్ నాలుగు నిమిషాల వ్యవధిలోనే రెండు గోల్స్ చేసింది. 48వ నిమిషంలో హరగూచీ, 52వ నిమిషంలో ఇన్నూ గోల్స్ చేయడంతో జపాన్ 2-0 ఆధిక్యంలోకి వెళ్లింది.

ఇక జపాన్ విజయం ఖాయం అనుకుంటుండగా.. బెల్జియం ఆటగాళ్లు అద్భుతం చేశారు. 69వ నిమిషంలో వెర్టోంజన్, 74వ నిమిషంలో ఫెల్లయిని, 90వ నిమిషంలో చాడ్లీ గోల్స్ చేసి తమ జట్టును గెలిపించారు.