కెరీర్‌‌లో ఎప్పుడూ ఇంతలా బాధపడలేదు: మెస్సీ

ఫిఫా ప్రపంచకప్‌ 2018లో అర్జెంటీనా ఆఖరి నిమిషంలో నాకౌట్‌కి అర్హత సాధించింది. తొలి రెండు మ్యాచ్‌ల్లో పేలవ ప్రదర్శనతో నిరాశపరిచిన ఆ జట్టు.. నాకౌట్ రేసులో నిలవాలంటే మంగళవారం రాత్రి నైజీరియాతో మ్యాచ్‌లో తప్పక గెలవాల్సి వచ్చింది. ఆ మ్యాచ్‌లో 14వ నిమిషంలో మెస్సీ గోల్‌ చేసి అర్జెంటీనాకి ఆధిక్యం అందించినా.. 51వ నిమిషంలో నైజీరియా ఆ ఆధిక్యాన్ని 1-1తో సమం చేసింది. దీంతో.. అర్జెంటీనా ఇక ఇంటిబాట పట్టక తప్పదని చాలా మంది తేల్చేశారు.

కానీ.. అనూహ్యంగా.. మ్యాచ్ మరో 4 నిమిషాల్లో ముగుస్తుందన్న దశలో రొజో కళ్లు చెదిరే గోల్‌తో అర్జెంటీనా నాకౌట్ ఆశలకి జీవం పోశాడు. సుదీర్ఘ కెరీర్‌లో మునుపెన్నడూ ఈ తరహా వేదనకి గురికాలేదని మెస్సీ వెల్లడించాడు. తొలి రెండు మ్యాచ్‌ల్లోనూ కనీసం ఒక గోల్‌ కూడా నమోదు చేయలేకపోయిన మెస్సీ.. తీవ్ర ఒత్తిడి మధ్య నైజీరియాతో మ్యాచ్ ఆడి ఎట్టకేలకి ప్రపంచకప్‌లో గోల్ ఖాతా తెరిచిన విషయం తెలిసిందే.

‘దేవుడు మాతోనే ఉన్నాడని నాకు తెలుసు. గ్రూప్ దశలోనే అర్జెంటీనా‌ నిష్క్రమించేలా అతను చేయడు. నైజీరియాతో మ్యాచ్‌లో గెలుస్తామని మేము కూడా పూర్తి విశ్వాసంతో ఉన్నాం. అయినప్పటికీ ఆశలు వదిలేసిన స్థితిలో మళ్లీ గెలవడం ఓ అద్భుతం. టోర్నీ ఆరంభంలో పేలవ ప్రదర్శనతో మేము గడ్డు పరిస్థితిని ఎదుర్కొన్నాం. నా కెరీర్‌లో నేను ఇంతలా బాధపడింది లేదు. తాజాగా నాకౌట్‌కి అర్హత సాధించడం అర్జెంటీనా జట్టుకి గొప్ప ఉపశమనం’ అని మెస్సీ వెల్లడించాడు. 31 ఏళ్ల ఈ దిగ్గజ ఫుట్‌బాలర్‌కి ఇదే చివరి ప్రపంచకప్ అని ప్రచారం జరుగుతుండగా.. సుదీర్ఘ కెరీర్‌లో ఇప్పటి వరకు మెస్సీ ఒక ప్రపంచకప్‌ని కూడా గెలవలేదు.