ఫిఫా వరల్డ్ కప్: ఈజిప్టుపై ఉరుగ్వే గెలుపు!

ఫిఫా ప్రపంచకప్‌లో భాగంగా ఈజిప్టు, ఉరుగ్వే జట్ల మధ్య రెండో మ్యాచ్ శుక్రవారం (జూన్ 15) జరిగింది. ఈ మ్యాచ్‌లో ఉరుగ్వే విజయం సాధించింది. మ్యాచ్‌ ప్రారంభం నుంచే ఇరు జట్లూ ప్రత్యర్థికి గోల్‌ చేసే అవకాశం ఇవ్వకుండా రక్షణాత్మకంగా ఆడాయి. మొదటి అర్ధభాగంలో ఎలాంటి గోల్స్ నమోదుకాలేదు. రెండో అర్ధభాగంలో చివరి వరకు కూడా పోటాపోటీగానే ఆడాయి. అయితే ఆట 89వ నిమిషం వరకు ఒక్క గోల్‌ నమోదు కాని ఈ మ్యాచ్‌లో శాంచెజ్ ఇచ్చిన ఫ్రీ కిక్‌తో జోస్ గిమెనెజ్ గోల్‌ కొట్టి ఉరుగ్వే శిబిరంలో ఆనందం నింపాడు. దీంతో ఉరుగ్వే 1-0తో ఈజిప్ట్‌పై విజయం సాధించింది.

బంతి ఎక్కువ సమయం ఉరుగ్వే ఆధీనంలోనే ఉంది. ఉరుగ్వే జట్టు గోల్ కోసం 6 సార్లు ప్రయత్నించగా, ఈజిప్టు జట్టు మాత్రం కేవలం 2 సార్లే గోల్ ప్రయత్నాలు చేయగలిగింది. మ్యాచ్‌లో ఈజిప్ట్‌ 12 అనవసర తప్పిదాలు చేయగా, ఉరుగ్వే 4 తప్పిదాలు చేసింది.