FIFA World Cup 2018: కోస్టారికాపై సెర్బియా విజయం!

ఫిఫా ప్రపంచకప్‌లో భాగంగా సమరా ఎరినా గ్రౌండ్‌లో ఆదివారం (జూన్ 17) జరిగిన మొదటి మ్యాచులో 'గ్రూప్-ఈ' నుంచి కోస్టారికా, సెర్బియా జట్లు తలపడ్డాయి. ఈ మ్యాచులో సెర్బియా జట్టు 1 - 0 తేడాతో కోస్టారికాపై విజయం సాధించింది. మ్యాచ్ ఆరంభం నుంచి ఇరు జట్లు ఆచితూచి ఆడాయి. దీంతో మొదటి అర్ధభాగంలో రెండువైపుల నుంచి ఎలాంటి గోల్స్ నమోదుకాలేదు. రెండో అర్ధభాగం ప్రారంభమైన కాసేపటికి సెర్బియా కెప్టెన్ కొలరోవ్ 56వ నిమిషంలో ఫ్రీకిక్ రూపంలో వచ్చిన అవకాశాన్ని గోల్‌గా మలిచాడు. దీంతో సెర్బియా ఆధిక్యంలోకి వెళ్లింది. ఈ మ్యాచులో సెర్బియా ఆటగాడు ఇవనోవిక్‌కు 104వ అంతర్జాతీయ మ్యాచ్ కావడం విశేషం.

తాజా విజయంతో సెర్బియా 20 ఏళ్ల తర్వాత ప్రపంచకప్ టోర్నమెంట్‌లో ఆడిన మొదటి మ్యాచును గెలిచింది. సెర్బియా జట్టు 1998లో ప్రపంచకప్‌లో ఇరాన్‌పై 1 - 0 తేడాతో గెలిచింది.