ఫుట్‌బాల్ పిచ్చి: సైకిల్‌పై 4 వేల కిలోమీటర్ల ప్రయాణంతో రష్యాకు..

ప్రపంచంలో ఎన్ని ఆటలు ఉన్నా.. ఫుట్‌బాల్ ఆటకు ఉండే ప్రత్యేకతే వేరు. తమ అభిమాన జట్లు ఆడుతున్న మ్యాచులు చూడ్డానికి తహతహలాడతుంటారు. ఇక 'ఫిఫా ప్రపంచకప్' గురించి చెప్పనక్కర్లేదు. చిన్నపెద్దా అంతా.. టీవీల ముందు వాలిపోతుంటారు. అయితే భారత్‌లో కూడా ఫుట్‌బాల్ ఆటకు వీరాభిమానులు ఉన్నారు. కేరళకు చెందిన ఓ వీరాభిమాని.. ఫిఫా ప్రపంచకప్ 2018 పోటీల్లో తన అభిమాన జట్టు ఆడే మ్యాచును చూసేందుకు సైకిల్‌పై రష్యాకు వెళ్లాడు.

కేరళలోని చేర్తలాకు చెందిన క్లిఫిన్ ఫ్రాన్సిస్(28) అనే యువకుడికి పుట్ బాల్ అంటే ప్రాణం. రష్యాలో జరుగుతున్న ఫిఫా వరల్డ్ కప్-2018 లో తన ఫేవరెట్ టీమ్ అర్జెంటీనా ఆడుతున్న మ్యాచ్ చూసేందుకు ఫిబ్రవరి 23న తన ప్రయాణం ప్రారంభించాడు. మొదట కొచ్చి నుంచి దుబాయ్‌కి విమానంలో వెళ్లాడు. దుబాయ్‌లో ఓ సైకిల్ కొనుక్కుని దుబాయ్, ఇరాన్, అజీర్బైజాన్ దేశాల మీదుగా రోడ్డు మార్గం ద్వారా 4 వేల కిలోమీటర్లు సైకిల్ తొక్కి రష్యాకు చేరుకున్నాడు.