ఫిఫా ప్రపంచకప్‌ మెస్సీకి అందని ద్రాక్షే..!

రష్యా వేదికగా జరుగుతున్న ఫిఫా ప్రపంచకప్‌‌లోకి భారీ అంచనాల మధ్య అడుగుపెట్టిన అర్జెంటీనా స్టార్ ఫుట్‌బాలర్ లియోనల్ మెస్సీ పేలవ ప్రదర్శనతో అభిమానుల్ని నిరాశపరిచాడు. పసికూన ఐస్‌లాండ్‌తో జరిగిన తొలి మ్యాచ్‌లో కేవలం ఒక గోల్‌తో సరిపెట్టి మ్యాచ్‌ను డ్రాగా ముగించిన మెస్సీ.. గురువారం రాత్రి క్రోయేషియాతో జరిగిన రెండో మ్యాచ్‌లో కనీసం ఆ మార్క్‌ని కూడా అందుకోలేకపోవడంతో అర్జెంటీనా ఘోర పరాజయాన్ని చవిచూసింది. దీంతో.. ఆ జట్టు నాకౌట్ దారులు దాదాపు మూసుకుపోయాయి. టోర్నీలో మెస్సీ పేలవంగా విఫలమవుతుంటే.. పోర్చుగల్ స్టార్ ఫుట్‌బాలర్ క్రిస్టియానో రొనాల్డో మాత్రం కళ్లుచెదిరే గోల్స్‌తో ఆ జట్టుని అద్వితీయంగా నడిపిస్తున్నాడు.

సుదీర్ఘకాలంగా ఫుట్‌బాల్ ఆడుతున్న మెస్సీ ఇప్పటి వరకు ఒక ప్రపంచకప్‌ను కూడా ముద్దాడలేదు. 2014లో జరిగిన ప్రపంచకప్‌ ఫైనల్ మ్యాచ్‌లో 0-1 తేడాతో జర్మనీ చేతిలో అర్జెంటీనా ఓడిపోయింది. ఆ తర్వాత 2015, 2016 కోపా అమెరికా ఫైనల్లోనూ అర్జెంటీనాకి నిరాశ తప్పలేదు. దీంతో.. 2016లో రిటైర్మెంట్ ప్రకటించిన మెస్సీ.. మళ్లీ ఆ నిర్ణయాన్ని వెనక్కి తీసుకున్నాడు. కానీ.. ఈసారి కూడా ప్రపంచకప్ గెలవాలనే అతని కోరిక నెరవేరేలా కనిపించడం లేదు. మరికొద్దిరోజుల్లోనే 31లోకి అడుగుపెట్టనున్న మెస్సీకి ఇదే ఆఖరి ప్రపంచకప్‌ కావొచ్చు. ఈ నేపథ్యంలో.. అతనికి వరల్డ్‌కప్ అందని ద్రాక్షగానే మిగిలిపోయే అవకాశం ఉంది.