మెస్సీ ఆ ఆనంద క్షణాల్ని అనుభవించు..!

ఫిఫా ప్రపంచకప్‌ 2018లో అర్జెంటీనాని విజేతగా నిలిపిన తర్వాత మెస్సీ ఆనందాన్ని తాను చూడాలనుకుంటున్నట్లు దిగ్గజ ఫుట్‌బాలర్ మరడానో వెల్లడించాడు. అర్జెంటీనా జట్టుకి 1986లో ప్రపంచకప్‌ అందించిన మరడానో.. తాజాగా రష్యా వేదికగా జరుగుతున్న ఫిఫాలో అర్జెంటీనా గెలుస్తుందని ‘టైమ్స్‌ ఆఫ్ ఇండియా’కి రాసిన వ్యాసంలో అతను ధీమా వ్యక్తం చేశాడు. 2014 ప్రపంచకప్ ఫైనల్లో జర్మనీ చేతిలో ఓడిన అర్జెంటీనా.. ఆ తర్వాత 2015, 2016 కోపా అమెరికా టోర్నీ ఫైనల్స్‌లోనూ ఓడిపోయింది. అయితే.. 32 ఏళ్ల సుదీర్ఘ నిరీక్షణకి ఈ ఏడాది ప్రపంచకప్‌తో మెస్సీ తెరదించుతాడని మరడానో విశ్వాసం వ్యక్తం చేశాడు.

‘ఫిఫా ప్రపంచకప్‌ని అర్జెంటీనా ఈ ఏడాది కచ్చితంగా గెలుస్తుంది. నేనేమీ అంచనాలు వేయడం లేదు.. ధీమాతోనే చెప్తున్నా. మెస్సీ ఈ కప్‌ని గెలవడం ద్వారా తన గొప్పతనాన్ని నిరూపించుకోవాల్సిన అవసరం లేదు. కానీ.. కప్ గెలవాలని అతను బలంగా కోరుకుంటున్నాడు. ఈ కోరికే ఇప్పుడు అర్జెంటీనా జట్టులో ఉత్సాహం నింపుతోంది. మెస్సీ కొన్ని క్షణాల వ్యవధిలోనే మ్యాచ్‌ని మలుపు తిప్పగలడు. ప్రపంచకప్ గెలిచిన తర్వాత ఆ క్షణాలు వర్ణాతీతం. ఆ అనుభవాన్ని మెస్సీ కూడా అనుభవించాలని నేను కోరుకుంటున్నా’ అని మరడానో వెల్లడించాడు.