యాప్నగరం

వీరు మెరిస్తేనే భారత్‌ ఖాతాలో పతకాలు!

రియోలో భారత అథ్లెట్లు ఒక్కొక్కరుగా రిక్త హస్తాలతో వెనుదిరుగుతున్నారు. ఈ పరిస్థితుల్లో పతకం సాధించాలన్న కోట్లాది మంది అభిమానుల ఆశలను మోస్తున్న ఆటగాళ్లు వీరే..

TNN 9 Aug 2016, 10:49 am
రియో ఒలింపిక్స్‌లో భారత్ పతకాల ఆశలు ఒక్కొక్కటిగా ఆవిరవుతున్నాయి. షూటింగ్‌, టెన్నిస్‌తో మొదలుపెట్టి ఆర్చరీ, హాకీ ఇలా అన్ని రంగాల్లోనూ భారత అథ్లెట్ల పేలవ ప్రదర్శన కొనసాగుతోంది. ఒకవైపు అమెరికా, చైనా తదితర దేశాలు పతకాల వేటలో దూసుకుపోతుంటే మనం మాత్రం బోణి కొట్టడానికే నిరీక్షించాల్సి వస్తోంది. ఈ పరిస్థితులను చూస్తోంటే రెండంకెల పతకాలు సాధించడం మాట దేవుడెరుగు.. కనీసం బీజింగ్ ఒలింపిక్స్‌లో సాధించినన్ని పతకాలనైనా గెలుచుకుంటారా అనే అనుమానం కలుగుతోంది. పతకం తెస్తాడనుకున్న జీతూ రాయ్ 8వ స్థానంతో సరిపెట్టుకోగా.. ఒలింపిక్స్‌లో వ్యక్తిగత విభాగంలో భారత్ తరఫున స్వర్ణం గెలుచుకొచ్చిన ఏకైక ఆటగాడు అభినవ్ బింద్రా తృటిలో పతకాన్ని కోల్పోయాడు. టెన్నిస్ డబుల్స్ పురుషుల విభాగంలో ఆటగాళ్ల మధ్య విబేధాల కారణంగా తొలి రౌండ్లోనే వెనుదిరగాల్సి వచ్చింది. ఇన్ని ఓటములు ఎదురైనా.. ఇప్పటికీ భారత పతక ఆశలు మాత్రం సజీవంగానే ఉన్నాయి.
Samayam Telugu india olympic medal chances depends on these athletes
వీరు మెరిస్తేనే భారత్‌ ఖాతాలో పతకాలు!


జిమ్నాస్టిక్‌లో దీపా కర్మాకర్ ఇప్పటికే ఫైనల్ చేరింది. ఆగష్టు 14 జరిగే ఫైనల్లో దీపా రాణిస్తే భారత్ పతకం సాధించే అవకాశం ఉంది. రెజ్లింగ్, టెన్నిస్ మిక్స్‌డ్ డబుల్స్, బ్యాడ్మింటన్, బాక్సింగ్ విభాగాల్లో భారత్ తరఫున కీలక ఆటగాళ్లు పోటీ పడుతున్నారు. టెన్నిస్ మిక్స్‌డ్ డబుల్స్‌లో రోహన్ బోపన్న, సానియా జోడీపై, బ్మాడింటన్‌లో సైనా నెహ్వాల్ మీద భారీగా ఆశలున్నాయి.

రెజ్లింగ్‌లో యోగేశ్వర్ దత్ కచ్చితంగా పతకంతో తిరిగి వస్తాడని అభిమానులు విశ్వసిస్తున్నారు. బాక్సింగ్‌లో శివ థాపా, వికాస్, మనోజ్ కుమార్‌లలో కనీసం ఒకరైనా పతకం సాధిస్తారనే నమ్మకం ఉంది. రాబోయే రోజుల్లో వీరి ప్రదర్శ మీదే భారత పతక అవకాశాలు ఆధారపడి ఉన్నాయి.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.