అట్టహాసంగా రియో ముగింపు వేడుకలు

రియో ఒలింపిక్స్ ముగిశాయి. బ్రెజిల్ లోని రియో డి జనీరో ఆగస్టు 5 నుంచి 21 వరకు జరిగిన విశ్వక్రీడా సంబరాలు పూర్తయ్యాయి. రియో ఒలింపిక్స్ ముగింపు సందర్భంగా మారకానా స్టేడియంలో వివిధ రకాల ప్రదర్శనలు జరిగాయి. వివిధ దేశాల క్రీడాకారులు వారి జాతీయ జెండాను పట్టుకుని కవాతు నిర్వహించారు. నిర్వాహకులు కళ్లు మిరుమిట్లు గొలిపేలా బాణాసంచా కాల్చారు. ఆరంభ వేడుకలను ఇదే స్టేడియంలో ఎంత ఆడంబరంగా నిర్వహించారో, ముగింపు వేడుకలను కూడా అంతే అట్టహాసంగా నిర్వహించారు. కాగా ఒలింపిక్స్ ముగింపు కార్యక్రమంలో భారత పతాకధారిగా సాక్షి మాలిక్ వ్యవహరించింది. ఆమె భారత జాతీయ జెండాను పట్టుకుని కార్యక్రమంలో కవాతు చేసింది. పీవీ సింధు ఇప్పటికే భారత్ వచ్చేయడంతో సాక్షికి భారత పతాకాన్ని పట్టుకునే అవకాశం వచ్చింది. కాగా రియో ఒలింపిక్స్ 2016 పతకాల పట్టికలో అగ్రస్థానాన్ని అమెరికా నిలబెట్టుకుంది. మొత్తం 46 స్వర్ణాలు, 37 రజతాలు, 38 కాంస్యాలను అమెరికన్ అథ్లెట్లు సాధించారు. తరువాతి స్థానాల్లో బ్రిటన్, చైనాలు నిలిచాయి. భారత్ రెండు పతకాలతో 64వ స్థానంలో ఉంది.