రియో భారతీయ ఒలింపియన్లకు దన్నుగా మాస్టర్ బ్లాస్టర్

రియో ఒలింపిక్ క్రీడల్లో పాల్గొంటున్న భారత ఒలింపియన్లకు క్రికెట్ దిగ్గజం సచిన్ టెండూల్కర్ వెన్నుదన్నుగా నిలుస్తున్నారు. క్రీడల తొలిరోజు అయిన శనివారం నాడు సచిన్ రియో ఒలింపిక్ క్రీడల గ్రామాన్ని సందర్శించారు. అక్కడ బస చేస్తున్న మన ఆటగాళ్లను కలిసి వారితో చాలా సేపు గడిపారు. 1998 కౌలాలంపూర్ కామన్ వెల్త్ క్రీడల నాటి తన మధుర స్మృతులను ఈ సందర్భంగా సచిన్ గుర్తుచేసుకుని వాటిని క్రీడాకారులతో పంచుకున్నారు. ప్రపంచ క్రీడాసంరంభంలో భారత దేశం తరఫున పోటీపడుతున్న అత్యున్నత ఆటగాళ్లతో కలిసి తాను పాల్గొనడం మరపురాని అనుభూతినిస్తోందని ఇంతకు మించిన అదృష్టం ఏ క్రీడాకారునికైనా ఏముంటుదని హర్షం వ్యక్తం చేసారు. ఏ రకంగా చూసినా మన ఆటగాళ్లందరూ మిగిలిన దేశాల ఆటగాళ్లకు ఏమాత్రం తీసిపోరన్నారు. దేశం కోసం శ్రమించి పతకాలను తీసుకువస్తారనే విశ్వాసం తనకుందని ఈ సందర్భంగా సచిన్ వ్యాఖ్యానించారు. రియో ఒలింపిక్ క్రీడల బ్రాండ్ అంబాసిడరుగా సచిన్ వ్యవహరిస్తున్న సంగతి తెలిసిందే. ఈ సందర్భంగా సచిన్ భారత అథ్లెట్లతో గడిపిన క్షణాల ఫోటోలను తెలుగు సమయం మీకు అందిస్తోంది.

ఫోటో క్రెడిట్: సంజీవ్ కుమార్, ఎన్బీటీ