ఒలింపిక్స్ పతకాల పట్టికలో అమెరికా మరోసారి అగ్రస్థానాన్ని పొందింది. రియో ఒలింపిక్స్లో ఆ దేశం 46 స్వర్ణ, 37 రజత, 38 కాంస్య పతకాలను సాధించింది. మొత్తంగా చూస్తే 121 పతకాలను తన ఖాతాలో వేసుకుంది. రెండో స్థానంలో ఉన్న గ్రేట్ బ్రిటన్ 27 స్వర్ణాలు, 23 రజత, 17 కాంస్య పతకాలతో 67 పతకాలను సాధించింది. మూడో స్థానంలో ఉన్న చైనా విషయానికి వస్తే.. ఆ దేశం ఖాతాలో 26 బంగారు పతకాలు, 18 వెండి, 26 కాంస్య పతకాలు కలుపుకొని మొత్తం 70 పతకాలున్నాయి. 2012లో లండన్లో జరిగిన సమ్మర్ ఒలింపిక్స్లోనూ అమెరికా పతకాల పట్టికలో తొలిస్థానంలో నిలిచింది. ఆ ఏడాది 46 స్వర్ణాలు సహా 103 పతకాలను అమెరికా అథ్లెట్లు కొల్లగొట్టారు. 2008లో సొంత గడ్డపై జరిగిన ఒలింపిక్స్లో సత్తా చాటిన చైనా 51 పసిడి పతకాలు సహా 100 పతకాలు సాధించి అమెరికాను వెనక్కి నెట్టి మరీ తొలి స్థానంలో నిలిచింది. 2012 ఒలింపిక్స్లో రెండో స్థానానికి పరిమితమైన చైనాను ఈ దఫా గ్రేట్ బ్రిటన్ వెనక్కి నెట్టింది. లండన్ ఒలింపిక్స్లో 38 స్వర్ణ పతకాలు సాధించిన చైనా రియోలో మాత్రం 26 బంగారు పతకాలతో సరిపెట్టుకుంది. ఒలింపిక్స్ గేమ్స్ మొదలైన నాటి నుంచి పతకాల వేటలో ఆధిపత్యాన్ని చూపుతున్న అమెరికా ఇప్పటి వరకూ 1000కి పైగా స్వర్ణ పతకాలను సాధించి ఎవరికీ అందనంత ఎత్తులో ఉంది. రియోలో 19 స్వర్ణాలతో రష్యా నాలుగో స్థానంలో, జర్మనీ ఐదో స్థానంలో ఉన్నాయి. ఒక రజతం, ఒక కాంస్య పతకం నెగ్గిన భారత్ 67వ స్థానంలో ఉంది.
రియో పతకాల పట్టికలో అమెరికాదే అగ్రస్థానం
ఒలింపిక్స్ పతకాల పట్టికలో అమెరికా మరోసారి అగ్రస్థానాన్ని సాధించింది. రియో ఒలింపిక్స్లో ఆ దేశం 46 స్వర్ణ, 37 రజత, 38 కాంస్య పతకాలను సాధించింది.
TNN 22 Aug 2016, 10:28 am