ఫుట్‌బాల్ దిగ్గజం డిగో మారడోనా గుండెపోటుతో కన్నుమూత

ప్రపంచ ఫుట్‌బాల్ దిగ్గజం, అర్జెంటీనా ఆటగాడు డిగో మారడోనా కన్నుమూశారు. బుధవారం (నవంబర్ 25) ఆయన తన నివాసంలో గుండెపోటుతో కుప్పకూలి మరణించారు. ఆయన వయసు 60 ఏళ్లు. గత అక్టోబర్ 30నే ఆయన తన 60వ పుట్టిన రోజును జరుపుకొన్నారు. 1960 అక్టోబర్ 30న మారడోనా జన్మించారు. ప్రస్తుతం ఆయన (Diego Maradona) అర్జెంటీనా ఫుట్‌బాల్ జట్టు మేనేజర్‌గా ఉన్నారు.

మారడోనాకు వైద్యులు నెల కిందటే మెదడుకు సంబంధించిన శస్త్ర చికిత్స చేశారు. ఓ రోడ్డు ప్రమాదంలో గాయపడటం వల్ల మారడోనాకు మెదడులో రక్తం గడ్డకట్టిందని.. ఆయనకు సర్జరీ చేశామని వైద్యులు తెలిపారు. ఆ ప్రమాదం నుంచి కోలుకున్నా.. అనతి కాలంలోనే ఆయన ఈ లోకం నుంచి వెళ్లిపోవడం కోట్లాది అభిమానుల కంటతడి పెట్టిస్తోంది.

మారడోనా అస్తమించడంతో ప్రపంచ ఫుట్‌బాల్ చరిత్రలో ఒక శకం ముగిసినట్లైంది. ఫుట్‌బాల్ పేరు చెబితే మొదటగా గుర్తొచ్చే పేరు డిగో మారడోనా. ఆ క్రీడను అంతలా ప్రభావితం చేశారాయన. అర్జెంటీనాకు ఎన్నో ట్రోఫీలు అందించారు.

ఫిఫా ఫుట్‌బాల్ ప్రపంచకప్‌లో నాలుగుసార్లు ఆడిన మారడోనా.. 1997లో ప్రొఫెషనల్ ఫుట్‌బాల్‌కు రిటర్మెంట్ ప్రకటించారు. 2008లో అర్జెంటీనా ఫుట్‌బాల్ జాతీయ జట్టుకు కోచ్‌గా వ్యవహరించారు. మారడోనా తన కెరీర్‌ ద్వితీయార్థంలో కొకైన్‌కు బానిసయ్యారు. 1991లో డోపింగ్‌ పరీక్షలో పట్టుబడి 15 నెలలు నిషేధానికి గురయ్యారు. ఇది ఆయన ప్రతిష్టను కాస్త మసకబార్చింది.

1986 ఫుట్‌బాల్ ప్రపంచకప్‌లో అర్జెంటీనా జట్టును ఫైనల్‌కు చేర్చడంలో, కప్పు అందించడంలో మారడోనా కీలక పాత్ర పోషించారు. ఆ టోర్నీ తర్వాత మారడోనా పేరు మార్మోగిపోయింది. మారడోనా మృతి పట్ల ప్రపంచవ్యాప్తంగా పలువురు ప్రముఖులు సంతాపం తెలుపుతున్నారు.