బాయ్‌కి షట్లర్ హెచ్‌ఎస్ ప్రణయ్ క్షమాపణలు

అర్జున అవార్డు కోసం తన పేరుని సిఫార్సు చేయకపోవడంతో భారత బ్యాడ్మింటన్ సంఘం (బాయ్‌)‌పై విమర్శలు గుప్పించిన స్టార్ షట్లర్ హెచ్‌ఎస్ ప్రణయ్ వెనక్కి తగ్గాడు. తొందరపడి నోరు జారినందుకు బాయ్‌కి ప్రణయ్ క్షమాపణలు చెప్పగా.. మరోసారి ఇలాంటి తప్పులు చేయొద్దని బాయ్ ప్రెసిడెంట్ హిమాంత బిశ్వా శర్మ, సెక్రటరీ అజయ్ సూచించారు.

గత ఏడాది తరహాలోనే ప్రణయ్‌ క్రమశిక్షణరాహిత్యాన్ని తెరపైకి తెచ్చిన భారత బ్యాడ్మింటన్ సంఘం (బాయ్).. ఈ ఏడాది అర్జున అవార్డు కోసం సాత్విక్ సాయిరాజ్, సమీర్ వర్మ, చిరాగ్ శెట్టి పేర్లని ఇటీవల సిఫార్సు చేసింది. దాంతో.. సహనం కోల్పోయిన ప్రణయ్.. మళ్లీ పాత కథే.. కామన్‌వెల్త్, ఆసియా ఛాంపియన్‌షిప్స్‌లో పతకాలు సాధించిన షట్లర్‌‌ని అర్జునకి బాయ్ కనీసం సిఫార్సు కూడా చేయలేదని విమర్శించాడు. దాంతో.. అతనికి షోకాజ్ నోటీసులు జారీచేసిన బాయ్.. సరైన వివరణ ఇవ్వాలని లేనిపక్షంలో చర్యలు తీసుకుంటామని హెచ్చరించింది.

వాస్తవానికి బాయ్ ఈ నెల 2న ముగ్గురు షట్లర పేర్లని అర్జున అవార్డుకి సిఫార్సు చేయగా.. అందులో ప్రణయ్ పేరు లేకపోవడంతో చీఫ్ కోచ్ గోపీచంద్ స్వయంగా ప్రణయ్ పేరుని సిఫార్సు చేసినట్లు తెలుస్తోంది. భారత బ్యాడ్మింటన్ చీఫ్ కోచ్‌గా కాకుండా.. రాజీవ్ గాంధీ ఖేల్‌రత్న హోదాలో అతను సిఫార్సు చేశారు. దాంతో.. ఆలస్యంగా విషయం తెలుసుకున్న ప్రణయ్.. క్షమాపణలు చెప్పడం.. బాయ్ దాన్ని ఆమోదించడంతో వివాదం సద్దుమణిగింది.