బ్యాడ్మింటన్ దిగ్గజానికి క్యాన్సర్.. బీఏఎం క్లారిటీ

బ్యాడ్మింటన్ దిగ్గజం, మలేసియా స్టార్ ప్లేయర్ లీ చోంగ్ వీ ప్రస్తుతం క్యాన్సర్ వ్యాధితో బాధపడుతున్నాడు. ముక్కుకు సంబంధించిన క్యాన్సర్‌తో లీ చోంగ్ పోరాడుతున్నాడని, తైవాన్‌లో చికిత్స పొందుతున్నాడని మలేసియా బ్యాడ్మింటన్ అసోసియేషన్ (బీఏఎం) శనివారం ప్రకటించింది.

వరుసగా మూడు ఒలింపిక్స్‌లో రజత పతకాలతో సత్తా చాటిన ఈ 35 ఏళ్ల స్టార్ ప్లేయర్ ఆరోగ్యంపై వదంతులు ప్రచారంలో ఉన్నాయి. వీటికి చెక్ పెట్టాలని భావించిన బీఏఎం లీ చోంగ్ వీ ఆరోగ్యం వివరాలు వెల్లడించింది. బీఏఎం అధ్యక్షుడు నోర్జా జకారియా మీడియాతో మాట్లాడుతూ.. ‘లీ చోంగ్ వీ ముక్కు క్యాన్సర్‌తో బాధపడుతున్నాడు. ప్రస్తుతం అతడు తైవాన్‌లో చికిత్స తీసుకుంటున్నాడు.

అందువల్లే అతడు వరల్డ్ చాంపియన్‌షిప్, ఏషియన్ గేమ్స్‌లో పాల్గొనలేదు. త్వరలోనే కోలుకుని అతడు మళ్లీ కెరీర్ కొనసాగిస్తాడని’ వివరించారు. ప్రపంచ మాజీ నంబర్‌ 1 బ్యాడ్మింటన్ ఆటగాడు లీ చోంగ్ ఆరోగ్యంపై వదంతులు వ్యాప్తి చేయడాన్ని తప్పుపట్టారు. మూడో స్టేజ్ క్యాన్సర్ అని ప్రచారం అవుతున్న వార్తలను కొట్టిపారేశారు.