Hockey World Cup 2018: విశ్వవిజేత బెల్జియం

నరాలు తెగేంత ఉత్కంఠగా సాగిన హాకీ ప్రపంచ కప్‌ను బెల్జియం సొంతం చేసుకుంది. భారత్ ఆతిథ్యమిచ్చిన హాకీ ప్రపంచ కప్‌ను నెదర్లాండ్స్‌పై 3-2 తేడాతో నెగ్గి బెల్జియం ఎగరేసుకుపోయింది. ఉత్కంఠ రేపిన తుదిపోరులో నెదర్లాండ్స్‌ను ఓడించిన వెంటనే బెల్జియం ఆటగాళ్లు ఉద్వేగానికి లోనయ్యారు. తొలుత ఆట పూర్తి సమయం ముగిసినా ఇరుజట్లు గోల్స్ ఖాతా తెరవలేదు. దీంతో ప్రపంచ కప్ విజేతను తేల్చేందుకు పెనాల్టీ షూటౌట్‌ అనివార్యమైంది.

తొలి ఛాన్స్‌లో బెల్జియం ఆటగాడు వాన్‌ అబెల్‌ ఫ్లోరెంట్‌ గోల్‌ కొట్టాడు. ఆపై నెదర్లాండ్స్‌ నుంచి జెరోన్‌ గోల్‌ చేయడంతో 1-1తో స్కోరు సమమైంది. రెండో పెనాల్టీ కిక్‌లో బెల్జియం, నెదర్సాండ్స్ విఫలమయ్యాయి. బెల్జియం మూడు, నాలుగు కిక్‌లను గోల్స్‌గా మలుచుకుంది. నెదర్లాండ్ కేవలం నాలుగో కిక్‌ను గోల్ చేసింది. దీంతో బెల్జియం 3-2 గోల్స్ తేడాతో సగర్వంగా ప్రపంచ విజేతగా అవతరించింది.

పురుషుల హాకీ ప్రపంచ కప్ సాధించిన ఆరో జట్టుగా బెల్జియం నిలిచింది. కాగా మూడుసార్లు ఛాంపియన్ అయిన నెదర్లాండ్స్ మరోసారి రన్నరప్‌తో సరిపెట్టుకుంది. 2014 వరల్డ్ కప్‌ ఫైనల్లో ఆస్ట్రేలియా చేతిలో నెదర్లాండ్స్ ఓటమి పాలైన విషయం తెలిసిందే. భారత్ 6వ స్థానలో నిలిచింది. బెల్జియం, నెదర్లాండ్స్, ఆస్ట్రేలియా, ఇంగ్లాండ్, జర్మనీ టాప్-5 స్థానాలు ఆక్రమించాయి.