కరోనా కట్టడిలో వాళ్లే హీరోలు: రేసర్ హామిల్టన్

కరోనా వైరస్ కట్టడిలో తమ ఆరోగ్యాన్ని కూడా పణంగా పెట్టి పనిచేస్తున్న డాక్టర్లు తన దృష్టిలో అసలైన హీరోలని ఫార్ములా వన్ రేసర్ లేవిస్ హామిల్టన్ అభిప్రాయపడ్డాడు. కరోనా వైరస్ బారిన పడిన యాక్టర్ ఎల్బాతో సన్నిహితంగా మెలిగినందుకు ప్రస్తుతం హామిల్టన్ కూడా సెల్ఫ్ ఐసోలేషన్‌లో ఉన్నాడు. కరోనా వైరస్ లక్షణాలేవీ తనకు లేనప్పటికీ.. బాధ్యతాయుత పౌరుడిగా స్వీయ నిర్బంధంలో ఉన్న హామిల్టన్.. కొంత మంది బాధ్యతారాహిత్యం, స్వార్థపూరితంగా సమాజంలో తిరుగుతున్నారని మండిపడ్డాడు.

Read More: ఈశాన్య రాష్ట్రాల్లో తొలి కరోనా కేసు నమోదు.. యూకే నుంచి వచ్చిన యువతికి

యూకేలో కరోనా వైరస్ వ్యాప్తి పతాక స్థాయికి చేరుకోగా.. జనం పిట్టల్లా రాలిపోతున్నారు. యుకే ప్రభుత్వం ముందస్తు జాగ్రత్తలు తీసుకోకపోవడమే ఈ వైఫరిత్యానికి కారణమని చెప్పుకొచ్చిన ఈ 35 ఏళ్ల బ్రిటన్ రేసర్.. వైద్యులు, నర్సులు తమ ప్రాణాల్ని పణంగా పెట్టి రాత్రింబవళ్లు పనిచేస్తున్నారని ప్రశంసించాడు. త్వరలో జరగాల్సిన మొనకో గ్రాండ్ ఫ్రిక్స్, ఎఫ్ 1 రేసులు ఇప్పటికే వాయిదా పడగా.. మే తర్వాత వాటి నిర్వహణపై తుది నిర్ణయం తీసుకోనున్నారు.

Read More: కరోనాతో ఫైట్.. 6 నెలల జీతం విరాళంగా ఇచ్చేసిన రెజ్లర్ భజరంగ్

‘‘యూకేలో చాలా మంది ప్రాణాలు కోల్పోతున్నందుకు చాలా బాధగా ఉంది. కానీ.. కొంత మంది స్వార్థపూరితంగా, నిర్లక్ష్యంగా ఇంకా రోడ్లపై తిరుగుతూ కరోనా వైరస్‌ని వ్యాప్తి చేస్తున్నారు. అందరూ బాధ్యతాయుతంగా స్వీయ నిర్బంధంలో ఉంటేనే వైరస్‌‌ని అడ్డుకోగలం. లేకపోతే.. అది దేశంలో ఇలానే వ్యాప్తి చెందుతూ ఉంటుంది. అయితే.. డాక్టర్లు, నర్సులు, లోకల్ స్టోర్స్, డెలివరీ బాయ్స్ తమ ఆరోగ్యాన్ని పణంగా పెట్టి పనిచేస్తున్నారు. నా దృష్టిలో వాళ్లందరూ హీరోలే. మనం ఇప్పుడు వారి ఆరోగ్యం కోసం ప్రార్థిద్దాం’’ అని హామిల్టన్ వెల్లడించాడు.