ఛాంపియన్స్ ట్రోఫీ హాకీ: ఆస్ట్రేలియా చేతిలో భారత్ ఓటమి

చాంపియన్స్ ట్రోఫీని ఎలాగైనా సొంతం చేసుకోవాలని కలలు కంటున్న భారత హాకీ జట్టు ఆశలకు ఆస్ట్రేలియా గండి కొట్టింది. గురువారం నాడు జరిగిన మ్యాచ్ లో ఆస్ట్రేలియన్ జట్టు చేతిలో 2-4తేడాతో భారత జట్టు పరాజయం పాలైంది. షూటర్ వి.ఆర్.రఘునాథ్, స్ట్రైకర్ మన్దీప్ సింగ్ చేసిన రెండు గోల్స్ ఆస్ట్రేలియా విజయాన్ని ఏమాత్రం ఆపలేకపోయాయి. ఆ జట్టు ఆటగాళ్లు ట్రెంట్ మిట్టన్, అరాన్ జాల్వేస్కీ, ఫ్లైన్ ఒగ్లీవీ ట్రిస్టీయన్ అద్భుతంగా రాణించి భారత జట్టును కట్టడి చేసారు.

ఈ మ్యాచ్ లో విజయంతో ఆస్ట్రేలియా జట్టు 13 పాయింట్లతో అగ్రస్థానంలో నిలిచింది. భారత్ జట్టు ఏడు పాయింట్లతో ఉంది. బ్రిటన్- బెల్జియం జట్ల మ్యాచ్ తరువాత భారత జట్టు పరిస్థితి ఏమిటో తేలుతుంది. ఫైనల్ కు చేరాలంటే భారత్ జట్టు ఆస్ట్రేలియాపై విజయం సాధించాల్సి ఉంది. కానీ జట్టు పరాజయం పాలవడంతో ఆశలు నీరుగారాయి. చాంపియన్స్ ట్రోఫీ ఫైనల్స్ లోకి వెళ్లే అవకాశాలు మెరుగుపడే విషయం బ్రిటన్-బెల్జియం జట్ల మధ్య జరిగే మ్యాచ్ పై ఆధారపడిఉంది.