పెళ్లి పీటలెక్కుతున్న చెస్ క్వీన్ హారిక

చెస్ ఛాంపియన్, ఆంధ్రప్రదేశ్ గ్రాండ్‌మాస్టర్ ద్రోణవల్లి హారిక పెళ్లి పీటలెక్కుతోంది. 27 ఈ గుంటూరు అమ్మాయి.. సివిల్ ఇంజినీర్ కార్తీక్ చంద్రను పెళ్లాడబోతోంది. వీరి వివాహం ఆగస్టు 19న జరగనుంది. ఈనెల 18న హైదరాబాద్‌లోని ఓ ఫైవ్‌స్టార్ హోటల్‌లో వీరి వివాహ నిశ్చితార్థం జరగబోతోంది. సివిల్ ఇంజినీరింగ్ పూర్తిచేసిన కార్తీక్.. ప్రస్తుతం తమ కుటుంబ వ్యాపారాన్ని చూసుకుంటున్నారు. కార్తీక్ కుటుంబం కూడా ఆంధ్రప్రదేశ్‌ రాష్ట్రానికి చెందినదేనని సమాచారం.

ఇదిలా ఉంటే, హారిక 1991 జనవరి 12న గుంటూరులో జన్మించింది. చిన్నప్పటి నుంచే చెస్‌పై ఇష్టం పెంచుకున్న హారిక అద్భుతంగా రాణించింది. అండర్‌-9 నేషనల్‌ ఛాంపియన్‌షిప్‌లో పతకం సాధించింది. ఆ తర్వాత పలు జాతీయ, అంతర్జాతీయ వేదికలపై ఎన్నో పతకాలు సాధించింది. 2008లో జూనియర్‌ ప్రపంచ చాంపియన్‌గా అవతరించిన హారిక.. 2011లో గ్రాండ్‌మాస్టర్‌ (జీఎం) హోదా సంపాదించింది. కామన్వెల్త్, ఆసియా చాంపియన్‌గా కూడా నిలిచిన హారిక 2012, 2015, 2017 ప్రపంచ చాంపియన్‌షిప్‌లలో కాంస్య పతకాలు సాధించింది. కోనేరు హంపి తర్వాత గ్రాండ్‌ మాస్టర్‌ హోదాను పొందిన రెండో మహిళా క్రీడాకారిణి రికార్డు కెక్కింది.