జకోవిచ్, ముర్రే ఔట్.. ఫెదరర్‌కి రూట్ క్లియర్!

వింబుల్డన్‌లో రోజర్ ఫెదరర్‌కి రూట్ క్లియర్ అయ్యింది. ఫేవరెట్లుగా దిగిన నలుగురు స్టార్లలో రఫెల్ నాదల్ ప్రిక్వార్టర్స్‌లోనే ఇంటిదారి పట్టాడు. బుధవారం జరిగిన క్వార్టర్ ఫైనల్లో డిఫెండింగ్ చాంపియన్ ఆండీ ముర్రే చతికిలపడ్డాడు. ఇక జకోవిచ్ గాయం కారణంగా టోర్నీ నుంచి వైదొలిగాడు. ఇక మిగిలింది ఫెదరరే. వాస్తవానికి ఈ నలుగురు సెమీస్‌కు చేరితో పోరు రసవత్తరంగా ఉంటుందని అందరూ భావించారు. కానీ అనూహ్యంగా ఫెదరర్ మాత్రమే సెమీస్‌కు చేరాడు. మిగిలిన ముగ్గురు దిగ్గజాలు నిష్క్రమించారు.

ఇప్పుడు ఫెదరర్‌కి పెద్ద పోటీ ఏమీలేదు. తిరుగులేని ఫామ్‌లో ఉన్న మూడో సీడ్‌ ఫెదరర్‌ అలవోకగా సెమీస్‌కు దూసుకెళ్లాడు. ఏకపక్షంగా సాగిన క్వార్టర్‌ఫైనల్లో ఫెదరర్‌ (స్విట్జర్లాండ్‌) 6-4, 6-2, 7-6 (7-4)తో ఆరో సీడ్‌ రోనిచ్‌ (కెనడా)ను ఓడించాడు. ఒక్క మూడో సెట్లోనే ఫెదరర్‌కు గట్టి పోటీ ఎదురైంది. మరోవైపు టాప్‌ సీడ్‌ ఆండీ ముర్రే (ఇంగ్లండ్) ఐదు సెట్లపాటు జరిగిన క్వార్టర్‌ఫైనల్లో 3-6, 6-4, 6-7 (4-7), 6-1, 6-1తో సామ్‌ క్వెరీ (అమెరికా) చేతిలో ఓడిపోయాడు. హోరాహోరీగా జరిగిన ఈ మ్యాచ్‌లో క్వెరీ చురుకుగా కదులుతూ ముర్రేను మట్టికరిపించాడు. 29 ఏళ్ల క్వెరీ గతంలో ఎన్నడూ గ్రాండ్‌స్లామ్‌ క్వార్టర్స్‌ దాటలేదు.

ముర్రేపై విజయంతో 2009 (ఆండీ రాడిక్‌) తర్వాత వింబుల్డన్‌ పురుషుల సింగిల్స్‌ సెమీస్‌ చేరిన తొలి అమెరికా ఆటగాడిగా క్వెరీ నిలిచాడు. ఇక సెర్బియా వీరుడు జకోవిచ్ విషయానికి వస్తే.. క్వార్టర్స్‌లో 11వ సీడ్‌ బెర్డిచ్‌ (చెక్‌‌రిపబ్లిక్)‌తో జకో తలపడ్డాడు. బెర్డిచ్ 7-6 (7-2), 2-0తో ఆధిక్యంలో ఉన్న దశలో జకోవిచ్‌ గాయం కారణంగా నిష్క్రమించాడు. మరోవైపు ఏడో సీడ్‌ సిలిచ్‌ (క్రొయేషియా) సెమీస్‌లో అడుగుపెట్టాడు. క్వార్టర్‌ఫైనల్లో సిలిచ్‌ 3-6, 7-6 (8-6), 7-5, 5-7, 6-1తో ముల్లర్‌ (లక్సెంబర్గ్‌)ను ఓడించాడు. దీంతో పురుషుల సింగిల్స్ సెమీ ఫైనల్‌కు ఫెదరర్, బెర్డిచ్, క్వెరీ, సిలిచ్ చేరారు.

శుక్రవారం జరిగే సెమీ ఫైనల్‌లో బెర్డిచ్‌తో ఫెదరర్.. క్వెరీతో సిలిచ్ తలపడతారు. ఇప్పటికే మంచి ఫామ్‌లో ఉన్న ఫెదరర్‌కు బెర్డిచ్ పెద్ద పోటీ ఏమీ కాదు. ఈ ట్రోఫీని ఫెదరర్ గెలిస్తే.. అత్యధిక సార్లు వింబుల్డన్ టైటిల్ సాధించిన ఆటగాడిగా చరిత్రకెక్కుతాడు. ప్రస్తుతం అత్యధిక టైటిళ్ల జాబితాలో రెన్షా, సంప్రాస్‌తో ఫెదరర్ సమానంగా ఉన్నాడు. మరోవైపు ప్రస్తుత వింబుల్డన్‌ను సొంతం చేసుకుంటే ఈ టైటిల్‌ గెలిచిన పెద్ద వయస్కుడిగా నిలిచే అవకాశం రోజర్‌ (35 ఏళ్లు) ముందుంది.