దుబాయ్ ఓపెన్‌తో సానియా మీర్జా రీఎంట్రీ

భారత టెన్నిస్ స్టార్ సానియా మీర్జా గాయం నుంచి కోలుకుని మళ్లీ రీఎంట్రీ ఇచ్చింది. బాబు పుట్టడంతో రెండేళ్లు ఆటకి దూరంగా ఉన్న సానియా.. గత జనవరిలో హోబర్ట్ ఇంటర్నేషనల్ టోర్నీతో రీఎంట్రీ ఇచ్చి.. అందర్నీ ఆశ్చర్యపరుస్తూ ఏకంగా టైటిల్ గెలిచిన విషయం తెలిసిందే. ఆ టోర్నీలో ఉక్రెయిన్ స్టార్ నదియాతో కలిసి బరిలోకి దిగిన సానియా.. ఫైనల్లో 81 నిమిషాల పాటు పోరాడి మరీ టైటిల్ గెలిచింది. ఆ వెంటనే ఆస్ట్రేలియా ఓపెన్‌ టోర్నీలో పోటీపడిన ఈ హైదరాబాద్ క్రీడాకారిణి మోకాలి గాయం కారణంగా.. ఆరంభంలోనే నిష్క్రమించింది.

గాయం నుంచి వేగంగా కోలుకున్న సానియా మీర్జా.. బుధవారం నుంచి ప్రారంభంకానున్న దుబాయ్ ఓపెన్‌లో బరిలోకి దిగబోతున్నట్లు ప్రకటించింది. ఈసారి ఫ్రెంచ్‌కి చెందిన కరోలిన్ గ్రేషియా‌తో కలిసి మహిళల డబుల్స్‌లో సానియా ఆడనుంది. ఆస్ట్రేలియా ఓపెన్‌లో.. అదీ ఫస్ట్ రౌండ్‌లోనే గాయంతో వెనుదిరగడం బాధించిందని చెప్పుకొచ్చిన సానియా.. మళ్లీ ఫిట్‌నెస్ సాధించడంలో సాయపడిన డాక్టర్‌ హయత్ ఖాన్‌కి థ్యాంక్స్ చెప్పింది.

‘గ్రాండ్‌ స్లామ్‌ నుంచి అర్ధాంతరంగా తప్పుకోవడం ఓ చేదు అనుభవం. మరీ ముఖ్యంగా.. రెండేళ్ల విరామం తర్వాత ఆటలోకి వచ్చిన తర్వాత ఇలా జరగడం బాధే. అయితే.. మా డాక్టర్ హయత్ ఖాన్‌కి థ్యాంక్స్ చెప్పాలి. అతని సహకారంతోనే వేగంగా.. మళ్లీ ఫిట్‌నెస్ సాధించగలిగాను. ఇప్పటికే నేను ప్రాక్టీస్ మొదలెట్టాను. దుబాయ్ ఓపెన్‌లో మెరుగైన ప్రదర్శన కనబరుస్తా’ అని సానియా మీర్జా వెల్లడించింది.