BWF ర్యాంకింగ్స్‌లో భారత షట్లర్స్ హవా

బ్యాడ్మింటన్ ఓపెన్ సూపర్ సిరీస్‌ల్లో గత కొంతకాలంగా తిరుగులేని ప్రదర్శనతో ఆకట్టుకుంటున్న భారత షట్లర్లు తాజాగా ప్రకటించిన బ్యాడ్మింటన్ వరల్డ్ ఫెడరేషన్ (బీడబ్ల్యూఎఫ్) ర్యాంకింగ్స్‌లోనూ హవా చాటారు. ఈ ర్యాంకింగ్స్ జాబితాలో పీవీ సింధు తన రెండో స్థానాన్ని నిలబెట్టుకోగా.. మరో క్రీడాకారిణి సైనా నెహ్వాల్‌ (12వ ర్యాంక్)‌ స్థానంలోనూ ఎలాంటి మార్పు లేదు. ఇటీవల ముగిసిన జపాన్‌ ఓపెన్‌ సూపర్ సిరీస్‌లో ఈ ఇద్దరు క్రీడాకారిణులు రెండో రౌండ్‌లోనే ఓడిపోయి టోర్నీ నుంచి వైదొలిగిన విషయం తెలిసిందే.

తాజా ర్యాంకింగ్స్‌లో మహిళా షట్లర్ల ర్యాంకింగ్స్‌లో ఎలాంటి మార్పులు లేకపోయినా.. పురుషుల షట్లర్లు మాత్రం
మెరుగైన స్థానానికి ఎగబాకారు. ఎంతలా అంటే.. టాప్-20లో ఏకంగా ఐదుగురు భారత క్రీడాకారులు చోటు దక్కించుకున్నారు. కిదాంబి శ్రీకాంత్ 8వ స్థానంలో నిలవగా.. జపాన్ ఓపెన్‌లో క్వార్టర్‌ఫైనల్ చేరిన హెఎస్ ప్రణయ్ నాలుగు స్థానాలు ఎగబాకి 15వ ర్యాంక్‌కి చేరుకున్నాడు. సాయి ప్రణీత్ (17), సమీర్ వర్మ (19), అజయ్ జయరామ్ (20) ఇలా కెరీర్‌లోనే బెస్ట్ ర్యాంక్స్‌ని మన క్రీడాకారులు అందుకున్నారు.