మేవెదరే కింగ్: సూపర్‌ఫైట్‌లో నెగ్గిన అమెరికా దిగ్గజం

ప్రపంచ చరిత్రలోనే అత్యంత ఖరీదైన బౌట్.. ప్రపంచం మొత్తాన్ని తమవైపు తిప్పుకున్న బౌట్.. ఫైట్ ఆఫ్ ద మిలీనియమ్.. మొత్తానికి ముగిసింది. వెల్టర్ వెయిట్ విభాగంలో ఇప్పటివరకు ఓటమి ఎరుగని మాజీ ప్రపంచ ఛాంపియన్ ఫ్లాయిడ్ మేవెదర్ బాక్సింగ్ రింగ్‌లో తనకు తిరుగులేదని మరోసారి చాటిచెప్పాడు. అల్టిమేట్ ఫైటింగ్ ఛాంపియన్‌షిప్ (యూఎఫ్‌సీ) లైట్ వెయిట్ ఛాంపియన్ అయిన ఐరిష్ జాతీయుడు మెక్ గ్రెగోర్‌‌పై మేవెదర్ అనూహ్య రీతిలో గెలిచాడు. దీంతో కెరీర్‌లో వరసగా 50వ విజయాన్ని మేవెవదర్ నమోదు చేశాడు. 40 ఏళ్ల వయసులోనూ ప్రత్యర్థిపై విరుచుకుపడిన తీరు అద్భుతం. మరోవైపు మెక్ గ్రెగోర్ వయసు 28 ఏళ్లు కావడం విశేషం.

భారత కాలమానం ప్రకారం ఆదివారం 9 గంటలకు లాస్ వెగాస్‌లోని టి-మొబైల్ అరీనాలో జరిగిన ఈ సూపర్ ఫైట్‌లో అమెరికా స్టార్ ఫైటర్ మేవెదర్ విజేతగా నిలిచాడు. 10 రౌండ్లపాటు జరిగిన మ్యాచ్‌లో పాయింట్ల ఆధారంగా మేవెదర్ గెలుపొందినట్టు నిర్వాహకులు ప్రకటించారు. తొలి రౌండు నుంచి గ్రెగోర్ ఆధిపత్యం కనిపించగా, ఐదో రౌండ్ నుంచి ఆట తీరును మేవెదర్ మార్చేశాడు. ప్రత్యర్థికి ఎంతమాత్రమూ అవకాశం ఇవ్వకుండా రెచ్చిపోయాడు. పంచ్‌ల వర్షం కురిపిస్తూ ఆధిపత్యం చెలాయించాడు. దీంతో 12 రౌండ్ల పాటు జరగాల్సిన ఫౌట్ 10 రౌండ్లకే ముగిసింది. మేవెదర్ పంచ్‌లకు తట్టుకోలేక అలసిపోయిన మెక్ గ్రెగోర్ 10 రౌండ్లో చేతులెత్తేశాడు.

‘ఫైట్ ఆఫ్ ద మిలీనియమ్’లో గెలిచిన ఫ్లాయిడ్ మేవెదర్‌కు 200 మిలియన్ డాలర్ల (సుమారు రూ. 1270 కోట్లు) ప్రైజ్ మనీ అందనుండగా.. మెక్ గ్రెగోర్‌కు 100 మిలియన్ డాలర్లు (సుమారు రూ. 630 కోట్లు) అందనుంది. కాగా, ఈ బౌట్‌కు ‘పే ఫర్ వ్యూ’ ద్వారానే 89.5 మిలియన్ డాలర్లు (సుమారు రూ. 570 కోట్లు) వచ్చినట్లు సమాచారం. ఇదిలా ఉండగా సూపర్ ఫైట్ ముగిసిన అనంతరం మేవెదర్ తన రిటైర్మెంట్‌ను ప్రకటించాడు. 50-0 రికార్డుతో తన కెరీర్‌ను ముగించాడు.