భారత్‌కి వుషు గేమ్‌లో పతకాల పంట..!

ఇండోనేషియా వేదికగా జరుగుతున్న ఆసియా గేమ్స్‌లో భారత్‌కి వుషు క్రీడలో బుధవారం నాలుగు కాంస్య పతకాలు లభించాయి. 60 కేజీల మహిళల విభాగంలో తొలుత పోటీపడిన రోషిబిని దేవి సెమీ ఫైనల్స్‌‌లో ఓడినా.. ఆమెకి రజత పతకం దక్కింది. అలానే.. 56 కేజీల పురుషుల విభాగంలో పోటీపడిన సంతోష్ కుమార్, 60 కేజీల విభాగంలో ఫైట్ చేసిన సూర్యభాను ప్రతాప్, 65 కేజీల విభాగంలో పోటీపడిన నరేందర్‌ గ్రేవాల్ ఈరోజు సెమీ ఫైనల్స్‌లో ఓడారు. అయినప్పటికీ.. వీరందరికీ కాంస్య పతకాలు లభించాయి. వుషు గేమ్‌లో సెమీస్‌లో ఓడిన వారికి కాంస్య పతకం ఇస్తారు. ఈరోజు 25 మీటర్ల ఎయిర్‌ పిస్టల్ విభాగంలో పోటీపడిన రహీ జీవన్ సర్నోబత్ స్వర్ణం పతకం గెలిచిన విషయం తెలిసిందే.

ఆసియా గేమ్స్‌లో నాలుగో రోజైన బుధవారానికి భారత్ పతకాల సంఖ్య 15కి చేరింది. ఇందులో 4 బంగారు పతకాలు ఉండగా.. 3 రజతం, 8 కాంస్యాలు ఉన్నాయి. పతకాల పట్టికలో చైనా 82 పతకాలతో అగ్రస్థానంలో కొనసాగుతోంది. ఆ దేశం ఇప్పటికే 37 పసిడి పతకాలను గెలుపొందింది. రెండో స్థానంలో జపాన్ ( మొత్తం 68 పతకాలు), తర్వాత కొరియా (49), ఇరాన్ (16) ఉన్నాయి. ఈ పట్టికలో భారత్ స్థానం 7.