వరల్డ్ కప్‌లో జీతూ రాయ్‌కి సిల్వర్ మెడల్

రియో ఒలంపిక్స్‌లో మెడల్ సాధించడంలో వైఫల్యం చెంది భారత్‌ని తీవ్రంగా నిరాశపర్చిన ఏస్ ఇండియన్ షూటర్ జీతూ రాయ్‌ తాజాగా ఐఎస్ఎస్ఎఫ్ వరల్డ్ కప్‌లో సిల్వర్ మెడల్ సాధించి తన సత్తా చాటుకున్నాడు. ఇటలీలో జరుగుతున్న ఐఎస్ఎస్ఎఫ్ వరల్డ్ కప్ ఫైనల్స్‌లో 50 మీటర్ల పిస్టల్ ఈవెంట్‌లో 188.8 స్కోర్ సాధించి సిల్వర్ మెడల్ సొంతం చేసుకున్నాడు జీతూ రాయ్. గురువారం జరిగిన ఈ పోటీల్లో 190.6 స్కోర్ తో చైనాకి చెందిన వీ ప్యాంగ్ మొదటి స్థానంలో నిలవగా, ఆతిథ్య దేశమైన ఇటలీకి చెందిన జిసెప్ జియోర్డనో 170.3 స్కోర్‌తో మూడవ స్థానం దక్కించుకున్నాడు.

జీతూ రాయ్‌కి ఈ సందర్భంగా కంగ్రాట్స్ చెప్పిన భారత మొట్టమొదటి, ఏకైక ఒలంపిక్స్ గోల్డ్ మెడలిస్ట్ అభినవ్ బింద్రా... జీతూ వచ్చే నాలుగేళ్లని ఎంతో జాగ్రత్తగా ప్లాన్ చేసుకోవాలని ట్వీట్ చేశారు.
Congratulations to Jitu Rai. He needs to plan his next four year cycle meticulously .— Abhinav Bindra (@Abhinav_Bindra) October 6, 2016