ఆరంభ మ్యాచ్‌లో చేజేతులా ఓడిన భారత జట్టు

అహ్మదాబాద్: వరల్డ్ కప్ కబడ్డీ తొలి మ్యాచ్‌లో ఆతిథ్య భారత జట్టుకు ఊహించని షాక్ ఎదురైంది. దక్షిణా కొరియా జట్టు ఇండియాను 34-32 తేడాతో ఓడించింది. కబడ్డీలో భారత్‌పై కొరియా విజయం సాధించడం ఇదే ప్రథమం కావడం విశేషం. తొలి అర్థ భాగం ముగిసే సరికి భారత్ 18-13 తేడాతో ఆధిక్యంలో ఉంది. చివరి వరకు భారత్‌దే ఆధిక్యం కొనసాగింది. కానీ చివరి రెండు నిమిషాల్లో చేసిన అనవసర తప్పిదాల వల్ల ఇండియా ఓటమి పాలైంది. మ్యాచ్ చివరి వరకూ అద్భుతంగా పోరాడిన కొరియా జట్టు అద్భుత విజయాన్ని సొంతం చేసుకుంది. ఇప్పటి వరకూ వరల్డ్ కప్ కబడ్డీలో భారత్‌కు తిరుగు లేదు. కానీ ఈసారి మాత్రం ఇరాన్, కొరియా నుంచి గట్టి పోటీ ఎదురు కావచ్చనే అంచనాలు ఉన్నాయి. తొలి మ్యాచ్ ఈ విషయాన్నే రుజువు చేసింది. మరో మ్యాచ్‌లో ఫేవరెట్‌గా బరిలో దిగిన ఇరాన్ అమెరికాపై 52-15 తేడాతో ఘన విజయం సాధించింది.