కశ్మీర్ నుంచి బుల్లి ప్రపంచ చాంపియన్

ఉత్తర కశ్మీర్‌లోని బందిపొర పట్టణ ప్రజలు గత రెండు దశాబ్దాలుగా కాల్పులు, అల్లర్ల మధ్య బిక్కుబిక్కుమని బతుకుతున్నారు. ఎప్పుడు ఏ దాడి జరుగుతుందో, ఎవరు బలవుతారో తెలియక ప్రజలు ఇళ్లలో నుంచి బటయకు రాలేని పరిస్థితి. కానీ ఆదివారం అక్కడి జనం ఈ భయలన్నిటీని మరిచిపోయారు. పట్టణ వీధుల్లోకి వచ్చిన వందలాది మంది ఆనందంతో డాన్సులు చేశారు. దీనంతటికీ కారణం ఓ ఎనిమిదేళ్ల బాలిక.

అవును బందిపొరకు చెందిన ఎనిమిదేళ్ల బాలిక తజాముల్ ఇస్లాం ప్రపంచ సబ్ జూనియర్ కిక్‌బాక్సింగ్ చాంపియన్‌గా నిలిచింది. ఇటలీలో జరిగిన ఈ చాంపియన్‌షిప్‌లో బంగారు పతకం సాధించింది. ఈ బాలికకు ఆర్మీ శిక్షణ ఇవ్వడం విశేషం.

‘ఇటలీ వెళ్లడానికి ముందు నేను చాలా భయపడ్డాను. కానీ నా శిక్షకులు ఎంతగానో ప్రోత్సహించారు. అప్పుడనుకున్న కశ్మీర్, ఇండియా ఖ్యాతిని చాటిచెప్పాలని, చివరకు సాధించాను’ అని బుల్లి తజాముల్ వెల్లడించింది. 2015లో న్యూఢిల్లీలో జరిగిన జాతీయ కిక్‌బాక్సింగ్ చాంపియన్‌షిప్‌లో తజాముల్ బంగారు పతకం సాధించింది. ఇప్పుడు ప్రపంచ చాంపియన్‌గా నిలిచింది. తజాముల్ బందిపొరలోని ఆర్మీ నడిపిస్తున్న ‘గుడ్‌విల్ స్కూల్’లో రెండో తరగతి చదువుతోంది. ప్రపంచ పోటీల్లో పాల్గొనడానికి న్యూఢిల్లీలో రెండు నెలల శిక్షణ పొందింది.

ప్రపంచ చాంపియన్‌గా నిలిచిన తజాముల్‌కు ఇండియన్ ఆర్మీ రూ. 1 లక్ష రివార్డును ప్రకటించగా, కశ్మీర్ ముఖ్యమంత్రి మెహబూబా ముఫ్తీ రూ. 50వేల రివార్డును ప్రకటించారు. తజాముల్ ప్రస్తుతం బీహార్‌లో నిర్వహించనున్న కిక్‌బాక్సింగ్ పోటీల కోసం సన్నద్ధమవుతోంది.