టాప్-10లోకి దూసుకొచ్చిన కిదాంబి శ్రీకాంత్

సూపర్ ఫామ్‌లో ఉన్న భారత్ యువ షట్లర్ కిదాంబి శ్రీకాంత్ కెరీర్‌లో మరోసారి బెస్ట్ ర్యాంక్‌ని అందుకున్నాడు. గురువారం ప్రకటించిన బ్యాడ్మింటన్ వరల్డ్ ఫెడరేషన్ (బీడబ్ల్యూఎఫ్) పురుషుల సింగిల్స్‌ ర్యాంకింగ్స్‌లో మూడు స్థానాలు ఎగబాకి 8వ స్థానాన్ని చేజిక్కించుకున్నాడు. గత 10 నెలల వ్యవధిలో శ్రీకాంత్ టాప్-10లోకి రావడం ఇదే తొలిసారి

ఇటీవల ముగిసిన ఇండోనేసియా ఓపెన్, ఆస్ట్రేలియా ఓపెన్ సూపర్ సిరీస్‌ల్లో దిగ్గజ షట్లర్లని సైతం మట్టికరిపించి శ్రీకాంత్ విజేతగా నిలిచిన విషయం తెలిసిందే. కేవలం ఒక వారం వ్యవధిలోనే రెండు టోర్నీల్లో వరల్డ్ ఛాంపియన్, ఒలింపిక్ ఛాంపియన్‌ చెన్ లాంగ్‌ని ఓడించడంతో ఈ యువ షట్లర్ ర్యాంక్ అమాంతం పెరిగింది.

రియో ఒలింపిక్స్‌లో క్వార్టర్ ఫైనల్ చేరడంతో గత ఏడాది అక్టోబరు‌లో టాప్-10లోకి వచ్చిన శ్రీకాంత్.. మళ్లీ ఈ జాబితాలో చోటు కోల్పోయాడు. కానీ.. తాజాగా వరుస టైటిళ్లతో మళ్లీ మెరుగైన ర్యాంక్‌ని అందుకున్నాడు. 2015 జూన్‌లో శ్రీకాంత్ అందుకున్న 3వ ర్యాంక్ ఇప్పటి వరకు అతని కెరీర్‌లో అత్యుత్తమ ర్యాంక్.