ఆస్ట్రేలియా ఓపెన్ ఫైనల్ చేరిన శ్రీకాంత్

బ్యాడ్మింటన్ సూపర్ సిరీస్‌ల్లో భారత యువ షట్లర్ కిదాంబి శ్రీకాంత్ జోరు కొనసాగుతోంది. వారం క్రితం ఇండోనేసియా సూపర్ సిరీస్‌ విజేతగా నిలిచిన శ్రీకాంత్.. తాజాగా మరో టైటిల్‌కి చేరువయ్యాడు. ఆస్ట్రేలియా ఓపెన్ సూపర్ సిరీస్‌లో భాగంగా శనివారం జరిగిన సెమీస్ మ్యాచ్‌లో నాలుగో సీడ్ షై యుకి (చైనా)పై అలవోక విజయం సాధించి టోర్నీ ఫైనల్ చేరాడు.

మ్యాచ్ ఆరంభం నుంచి యుకిపై మన శ్రీకాంత్‌దే ఆధిపత్యం కొనసాగింది. తొలి సెట్‌ని 21-10తో చేజిక్కించుకున్న కిదాంబి.. రెండో సెట్‌లోనూ అదే జోరును కొనసాగించి 21-14తో విజయాన్ని అందుకున్నాడు. కొద్దిరోజుల క్రితం సింగపూర్ ఓపెన్‌లో రన్నరప్‌గా నిలిచిన ఈ యువ షట్లర్.. అనంతరం ఇండోనేసియా టైటిల్ గెలవడం తాజాగా మరో సూపర్ సిరీస్ ఫైనల్ చేరడం విశేషం. ఇలా వరుసగా మూడు సూపర్ సిరీస్‌ల్లో ఒక భారత పురుష షట్లర్ ఫైనల్ చేరడం ఇదే తొలిసారి. ఆదివారం ఫైనల్ జరగనుంది.