సింధుకొచ్చిన కోట్ల గురించి తెలుసుకొని షాకైన మారిన్

రియో ఒలింపిక్స్‌లో రజత పతకం గెలిచిన తర్వాత పీవీ సింధుకు వచ్చిన నగదు బహుమతి ఎంత మొత్తమో తెలుసా? అక్షరాలా రూ.13 కోట్లు. ఈ విషయం తెలుసుకొని రియో ఫైనల్లో సింధుపై విజయం సాధించి, ఒలింపిక్స్‌ స్వర్ణం నెగ్గిన కరోలినా మారిన్ నోరెళ్లబెట్టింది. ప్రసుత్తం సింధు, మారిన్ ప్రీమియర్ బ్యాండ్మింటన్ లీగ్ ఆడుతున్న సంగతి తెలిసిందే. ఈ సందర్భంగా ఢిల్లీలో మీడియాతో మాట్లాడిన మారిన్ సింధుకు వచ్చిన నగదు బహుమతి గురించి తెలుసుకొని ఆశ్చర్యపోయినట్లు చెప్పింది.

మరి స్వర్ణం గెలిచావ్ నీకు కూడా పెద్ద మొత్తంలోనే నజరానా వచ్చి ఉంటుంది కదా అని ప్రశ్నిస్తే.. అంత సీనేం లేదు.. నాకు స్పెయిన్ సర్కారు ఇచ్చింది రూ. 70 లక్షలే. సింధుకు వచ్చిన నజరానాతో పోల్చుకుంటే నాకు దక్కింది 10-15 శాతమే అని బదులిచ్చింది. ఒలింపిక్స్ మెడల్ సాధించిన అథ్లెట్లపై ఇండియాలో నోట్ల వర్షం కురవడంపై మారిన్ కోచ్‌ కూడా ఆశ్చర్యం వ్యక్తం చేశారు.

రియోలో రజతం సాధించడంతో సింధు ఒక్కసారిగా స్టార్‌గా మారిన విషయం తెలిసిందే. బ్యాండ్మిటన్ ఫైనల్ చేరిన సింధు.. భారత్‌కు ఒలింపిక్ మెడల్ అందించడంతో ప్రభుత్వాలు ఆమెకు పోటీపడి మరీ నగదు ప్రోత్సాహకాలను ప్రకటించాయి. తెలుగు రాష్ట్రాలు కోట్లాది రూపాయల డబ్బును ఆమెకు నజరానాగా ఇచ్చాయి. సచిన్ కూడా మిగతా అథ్లెట్లతోపాటు సింధుకు బీఎండబ్ల్యూ కారును బహూకరించాడు. ఇవే కాకుండా ఆమెను బ్రాండ్ అంబాసిడర్‌గా నియమించుకోవడం కోసం కార్పొరేట్ సంస్థలు క్యూ కట్టాయి.

సింధుకు ఇంత మొత్తంలో నజరానాలు ప్రకటించడం పట్ల మారిన్ ఆశ్చర్యం వ్యక్తం చేయడంలో వింతేమీ లేదు. భారత్‌లో క్రీడలకు ఎంతో ప్రోత్సాహం లభిస్తోందని ఆమె అనుకుంటుండవచ్చు. కానీ అది నాణేనికి ఒకవైపు మాత్రమే. ఒలింపిక్స్ మెడల్ గెలిస్తే ఆకాశానికి ఎత్తేసి, పోటాపోటీగా కోట్లు ఇచ్చేసే ఇక్కడి ప్రభుత్వాలు.. ప్రపంచ స్థాయి క్రీడల కోసం సన్నద్ధమయ్యే అథ్లెట్లను ఎంతగా ప్రోత్సహిస్తున్నాయో తెలిస్తే.. మారిన్ ఇక్కడి ప్రభుత్వాలను అసహ్యించుకోవడం ఖాయం.