మెరిసిన ముర్రే.. మురిసిన బ్రిటన్

బ్రిటన్ ఆటగాడు ఆండీ ముర్రే వింబుల్డన్ టైటిల్ గెలుపొందాడు. ఆదివారం జరిగిన ఫైనల్లో సొంత గడ్డపై రౌనిక్‌తో తలపడిన ముర్రే 6-4, 7-6 (7-3), 7-6 (7-2)తో వరుస సెట్లలో విజయం సాధించాడు. 2013లోనూ ముర్రే వింబుల్డన్ టైటిల్ గెలుపొందాడు. ఇప్పటి వరకూ పదిసార్లు గ్రాండ్ స్లామ్ టోర్నీల్లో ఫైనల్ చేరిన ముర్రే రెండు సార్లు మాత్రమే విజయం సాధించాడు. అవి కూడా వింబుల్డన్ టైటిళ్లే కావడం విశేషం. ఈ విజయంతో 1935లో ఫ్రెడ్‌ పెర్రీ తర్వాత ఒకటి కంటే ఎక్కువ వింబుల్డన్‌ పురుషుల సింగిల్స్‌ టైటిళ్లు గెలిచిన తొలి బ్రిటన్‌ ఆటగాడిగా ముర్రే రికార్డు నెలకొల్పాడు. గత మూడు గ్రాండ్ స్లామ్ ఫైనల్స్‌లో జకోవిచ్ చేతిలో ఓడిన ముర్రేకు ఈసారి అతడి అడ్డంకి లేకపోవడం లాభించింది. ఈ అవకాశాన్ని సద్వినియోగం చేసుకున్న ముర్రే సొంత ప్రేక్షకుల మద్దతుతో రౌనిక్‌ను ఓడించాడు. సెమీఫైనల్లో ఫెదరర్‌పై సంచలన ప్రదర్శన చేసిన రౌనిక్‌ తొలిసారిగా గ్రాండ్ స్లామ్ ఫైనల్ ఆడుతున్నందున ఒత్తిడిగా ఫీలయ్యాడు. దీంతో అతడి సర్వీస్‌లను ఆండీ దీటుగా ఎదుర్కొన్నాడు. మూడేళ్ల తర్వాత గ్రాండ్ స్లామ్ టైటిల్ గెలుపొందిన ముర్రే విజయానంతరం భావోద్వేగాన్ని ఆపుకోలేకపోయాడు.